Bizge belgili, zamanagóy elektron hám elektrotexnikalıq sheshimler barlıq tarawlarǵa kirip barǵan. Búgingi kúnde olar mámleketlik uyımlar hám finans-bank sektorınan baslap, biznes hám kúndelikli qolaylıqlarǵa shekem keńnen engizilmekte.

Usı mániste, innovaciyalıq texnologiyalar processlerdi avtomatlastırıw, kárxana nátiyjeliligin arttırıw, qáwipsizlikti támiyinlew jáne ekonomikalıq rawajlanıw hám turmıs sapası ushın jańa imkaniyatlar jaratadı.
“Elektronika, elektrotexnika hám innovaciyalıq texnologiyalar – E-TechExpo 2025” 4-xalıqaralıq kórgizbesin shólkemlestiriw bul processte áhmiyetli bolıp, onda tutınıwshı, sanaat hám biznes ushın mólsherlengen aldınǵı texnologiyalar, úskeneler hám ónimlerdi kórsetiw dástúrge aylanıp úlgerdi.
Búgin paytaxtımızdaǵı “Ózekspooray” milliy kórgizbeler kompleksinde óz jumısın baslaǵan “E-TechExpo 2025” xalıqaralıq kórgizbesi islep shıǵarıwshılar ushın jáne bir márte usınday maydandı jaratıp berdi.
“Iteca Exhibitions” xalıqaralıq kórgizbe kompaniyası hám onıń sherigi “ICA Eurasia Group” jáne “Ózeltexsanaat” associaciyası menen birgelikte shólkemlestirilgen ilajda sırt el kompaniyaları qatarında 100 den aslam jergilikli kárxana da qatnaspaqta.
“Uzkabel” akcionerlik jámiyetiniń marketing bólimi qánigesi Zuhriddin Normurodovtıń atap ótiwinshe, kórgizbeniń birinshi kúninen-aq kárxana ónimlerine qızıǵıwshılardıń sanı biraz kóp bolǵan.
– Kárxanamız kabel hám ótkizgish ónimlerin islep shıǵaradı. Zamanagóy texnologiya hám úskenelerden paydalanıp, talap standartlarına say sapalı ónimler tayarlaymız. Óziniń kóp jıllıq tariyxına iye kárxana búgingi kúnde 3 mıńnan aslam túrdegi ónim islep shıǵarmaqta. 1000 nan aslam jumısshı-xızmetkerge iye kompaniyamız jergilikli hám sırt el bazarında óz ornına iye. Kórgizbe biz ushın birge islesiw imkaniyatların keńeytedi hám usı maqsette turaqlı qatnasıp kelemiz, – dedi ol.
Qatnasıwshılar tárepinen zamanagóy turmıslıq texnika, kabel-sım ónimleri, elektr ótkizgishler, energiyanı únemlewshi jaqtılandırıw sistemaları, transformator úskeneleri, avtomatlastırılǵan basqarıw sheshimleri hám quyash energiyasına tiykarlanǵan innovaciyalıq qurılmalar usınıs etilmekte.
– Úsh jıldan berli jumıs alıp barıp atırǵan “Mono Electric” kompaniyamız ishki hám sırtqı bazarda óz poziciyasın bekkemlep, turaqlı rawajlanbaqta. Búgingi kúnde mámlekettiń hár bir wálayatında sheriklerimiz jumıs alıp barmaqta. Kárxanamız elektr úskenelerin islep shıǵaradı, bul tarawda joqarı sapa hám innovaciyalarǵa ayrıqsha itibar qaratpaqta. Házirgi waqıtta ónimlerimiz 8 sırt mámleketke eksport etiledi. Bul bolsa kárxananıń xalıqaralıq maydandaǵı tán alınıwı hám básekige shıdamlılıǵın kórsetedi. Búgingi kúnde “Mono Electric”te 400 den aslam qánige jumıs isleydi. Sonıń menen birge, biz imkaniyatı sheklengen shaxslar menen birge islesip, olar ushın qosımsha jumıs orınların jaratıwǵa umtılamız, – dedi kárxananıń sawda bóliminiń menedjeri Shohrux Inogomov.
“E-TechExpo 2025” xalıqaralıq kórgizbesi zamanagóy elektron hám elektrotexnikalıq sheshimlerdiń áhmiyetin kórsetiw menen birge, jergilikli hám xalıqaralıq birge islesiwdi bekkemlew, jańa texnologiyalardı sınaqtan ótkeriw hám innovaciyalıq rawajlanıw imkaniyatların keńeytiwde zárúr esaplanadı. Bul túrdegi ilajlar sanaat hám biznes tarawın jáne de rawajlandırıw, eksport potencialın arttırıw hám keleshektegi qollanbalardı jámiyetshilikke usınıwda ayrıqsha áhmiyetke iye.

Nasiba Ziyodullaeva, Oybek Pardaev (surat), ÓzA