Mámleketleraralıq doslıq baylanısların jáne de bekkemlew, óz-ara birge islesiwdiń jańa baǵdarların belgilew hám parlamentleraralıq qarım-qatnastı rawajlandırıw maqsetinde kóplegen mámleketlerdiń parlamentleri menen birge islesiw hám doslıq toparlarınıń jumısı jolǵa qoyılǵan.

Sonıń ishinde, Ózbekstan Respublikası Oliy Majlisi hám Vetnam Socialistlik Respublikası Milliy májilisi arasında da parlamentleraralıq birge islesiw boyınsha toparlar shólkemlestirilgen.
Bul toparlardıń onlayn ushırasıwı bolıp ótti. Onda Ózbekstan hám Vetnam arasındaǵı qatnasıqlar áyyemgi tariyxıy tamırlarǵa iye ekeni atap ótildi.
Búgingi kúnde eki mámleket basshılarınıń siyasiy erk-ıqrarı sebepli barlıq tarawlarda birge islesiw barǵan sayın izbe-iz rawajlanıp barmaqta. Keyingi jıllarda ótkerilgen joqarı dárejedegi ushırasıw hám sapar etiwler óz-ara isenimdi bekkemlep, birge islesiwdi jańa basqıshqa alıp shıqtı.
Mádeniy-gumanitarlıq tarawda óz-ara birge islesiw boyınsha da pikir alısıldı. Atap aytqanda, Tashkent mámleketlik shıǵıstanıw universitetinde Vetnam tili hám mádeniyatı orayınıń jumıs alıp barıp atırǵanı, sonday-aq, eki mámleket arasında tikkeley aviaqatnawlar jolǵa qoyılǵanı, bul bolsa, xalıqlar arasındaǵı jaqın qatnasıqlardı bekkemlep atırǵanı atap ótildi.
Ushırasıw juwmaǵında birge islesiw boyınsha parlamentleraralıq toparlardıń jumısın sistemalı jolǵa qoyıw, olardıń hár jılı keminde bir márte qospa májilisin ótkeriw jáne gezektegi qospa májilisti Ózbekstanda shólkemlestiriwge kelisip alındı.

N.Abduraimova, ÓzA