Usı jıldıń 10-noyabr kúni Egipet Arab Respublikasınıń newsroom.info internet basılımında Imam Buxariy xalıqaralıq ilimiy-izertlew orayınıń úlken ilimiy xızmetkeri Otabek Muhammadiyevtiń “Diniy keńpeyillik hám milletleraralıq tatıwlıq – biybaha tınıshlıǵımız girewi” atamasındaǵı maqalası járiyalandı.

Maqalada ǵárezsizliktiń dáslepki jıllarınan baslap elimizde túrli din hám millet wákilleri arasındaǵı awızbirshilik, óz-ara húrmet hám keńpeyillik ortalıǵın bekkemlew mámleketlik siyasattıń tiykarǵı baǵdarlarınan birine aylanǵanı atap ótilgen. Avtor Ózbekstanda hár bir puqaraǵa óz isenimin erkin ámelge asırıwı ushın zárúr huqıqıy hám ruwxıy tiykarlar jaratılǵanın, túrli dinlerge tiyisli qádiriyatlar, muqaddes orınlar hám dástúrler qásterlep-saqlanıp atırǵanın ayrıqsha atap ótken.
Sonıń menen birge, maqalada Ózbekstan Respublikası Konstituciyasınıń puqaralar teńligine baylanıslı qaǵıydası da keltirilgen.
Bul norma tek ǵana huqıqıy princip sıpatında emes, al puqaralardıń sanasında keńpeyillik hám óz-ara húrmetti bekkemlewde úlken áhmiyetke iye ekeni atap ótilgen.
Avtor maqalasında muqaddes islam táliymatlarında keńpeyillik “múriwbet” túsinigi menen túsindiriliwin, bul bolsa insandı gózzallıqqa, miyrim-shápáátke hám ádalatlı múnásibetke shaqıratuǵının atap ótedi. Oǵan bola, islam aǵartıwshılıǵınıń tiykarında da tap usınday jaqsı qatnas jatadı: hár bir isenim, mádeniyat hám dástúrge húrmet penen qaraw, pikir hám diniy kózqaraslardıń hár túrliligine shıdamlılıq penen qatnas jasaw jámiyettiń turaqlılıǵı hám tınıshlıǵınıń tiykarı bolıp esaplanadı.
Bunday xalıqaralıq basılımlarda ózbek ilimpazlarınıń maqalalarınıń basıp shıǵarılıwı mámleketimizde diniy keńpeyillik hám milletleraralıq tatıwlıq tarawında ámelge asırılıp atırǵan reformalar hám ilimiy-aǵartıwshılıq jumıstıń xalıqaralıq maydanda da tán alınıp atırǵanınan derek berip, dúnya jámiyetshiliginde elimiz haqqındaǵı unamlı pikirdi jáne de bekkemleydi, islam dininiń haqıyqıy adamgershilik hám tınıshlıqqa shaqırıwshı mánisin jarıtıwda áhmiyetli orın iyeleydi.

Ǵ.HASANOV,
ÓzAnıń xabarshısı