Elimizde bolıp atırǵan jańalanıw processleriniń rawajlanıwına Ózbekstan kásiplik awqamları Federaciyası da múnásip úles qosıp kelmekte. Usı kúnlerde mámleketimiz boylap keńnen belgilenip atırǵan Ózbekstan kásiplik awqamları háreketiniń 120 jıllıǵına baǵıshlanǵan ilajlarda bul tárepler jáne bir márte óziniń ayqın kórinisin tappaqta. Ásirese, sáne múnásibeti menen Ózbekstan Respublikası Prezidenti Shavkat Mirziyoevtiń qutlıqlawı bayramǵa ózgeshe quwanısh baǵıshladı.

Paytaxtımızdaǵı Ózbekstan kásiplik awqamları sarayında 11-noyabr – Ózbekstan kásiplik awqamları kúni múnásibeti menen saltanatlı ilaj shólkemlestirildi.
Oǵan Ózbekstan Respublikası Prezidenti Administraciyası, Ministrler Kabinetiniń wákilleri, senatorlar, deputatlar, taraw belsendileri, xalıqaralıq miynet hám kásiplik awqamları shólkemleriniń basshıları mirát etildi.
Ózbekstan Respublikası Prezidenti Shavkat Mirziyoevtiń Ózbekstan kásiplik awqamlarınıń belsendileri hám aǵzalarına qutlıqlawın Ózbekstan Respublikası Prezidenti Administraciyası Kommunikaciyalar departamentiniń basshısı – Ózbekstan Respublikası Prezidentiniń baspasóz xatkeri Sherzod Asadov oqıp esittirdi.
Haqıyqatında da, qutlıqlawda atap ótilgenindey, Jańa Ózbekstan – insan ómiri, onıń salamatlıǵı, huqıq hám mápleri, qádir-qımbatı nızam tiykarında isenimli qorǵalatuǵın mámleket degeni.
Sonıń ushın óz qatarlarında segiz millionǵa shamalas aǵzanı birlestirgen kásiplik awqamlarınıń miynet tarawındaǵı huqıq hám máplerdi qorǵaw, ádillik hám teńlik principlerin támiyinlew baǵdarındaǵı bir ásirden aslam tájiriybe mektebi elimizde jańa jámiyet, jańa mámleket qurıwda oǵada úlken áhmiyetke iye.
Bul haqıyqattı tereń túsingen kásiplik awqamlarınıń belsendileri sociallıq tarawdaǵı baǵdarlamalardı ámelge asırıw, ásirese, kámbaǵallıqtı qısqartıw, bántlikti támiyinlew, jaslar, nuraniylar, hayal-qızlardıń máplerin qorǵawda ayrıqsha belsendilik kórsetip kelmekte.
Sáne múnásibeti menen Prezidentimizdiń “Ózbekstan kásiplik awqamları háreketiniń 120 jıllıǵı múnásibeti menen taraw xızmetkerlerinen bir toparın sıylıqlaw haqqında”ǵı pármanı qabıl etilgeni bul jámiyetlik strukturaǵa qaratılıp atırǵan itibardıń ámeliy tastıyıǵı bolıp esaplanadı.
Saltanatlı ilajda Watanımızdıń orden hám medalların Ózbekstan Respublikası Oliy Majlisi Senatınıń Baslıǵı Tanzila Norboeva tapsırdı.
Saltanatlı ilajda shıǵıp sóylegenler tarawdıń rawajlanıwı jolında kórsetilip atırǵan úlken itibar ushın mámleketimiz basshısına minnetdarshılıq bildirdi.
– Insan qádiri jańa Ózbekstanda reformalardıń baslı maqseti, tiykarǵı mazmun-mánisin quramaqta, – dedi “Shuhrat” medalınıń iyesi, Ózbekstan kásiplik awqamları Federaciyası baspasóz xızmetiniń basshısı Muhabbat Wrmonbekova. – Ózbekstan insan huqıqları menen máplerin qorǵaw, miynetti qorǵaw, xızmetkerler hám olardıń shańaraq aǵzalarınıń salamatlıǵın bekkemlew máselelerine úlken itibar qaratpaqta. Mámleketimiz basshısınıń biz taraw wákillerine itibarı kewlimizdi kókke kóterdi. Házirgi waqıtta bunday itibar jáne de úlken juwapkershilik penen miynet etiwge iytermeleydi.
Saltanatlı ilajda Ózbekstan kásiplik awqamlarınıń 120 jıllıq tariyxına baylanıslı teatrlastırılǵan muzıkalı baǵdarlama qoyıp berildi.
Ilajda Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova qatnastı.

Nazokat Usmonova,
Nosir Haydarov (súwret),
ÓzAnıń xabarshıları