Prezident Shavkat Mirziyoev 11-noyabr kúni Jańa Tashkentte iri sport obekti – zamanagóy futbol stadionınıń qurılısına irge tasın qalaw máresiminde qatnastı.

Sońǵı bes jıl mámleketimiz futbol tarawında túpkilikli burılıs dáwiri boldı. Sonıń ishinde, jergilikli chempionatlar sisteması reformalanıp, balalar hám jas óspirimler akademiyaları shólkemlestirildi, aymaqlarda 75 úlken hám 302 mini stadion jumıs alıp barmaqta.
Bizge belgili, 2017-jılı elimizde FIFA hám Aziya futbol konfederaciyası talaplarına juwap beretuǵın maydanlardıń sanı tek ǵana úshew bolǵan. Búgin olardıń sanı 10 nan astı.
Jaqında Joqarı Shırshıq rayonında zamanagóy Milliy futbol orayı qurıp pitkerildi. Futbol mekteplerinde 65 mıńnan aslam jaslar shınıǵıwlar ótkermekte. Bul mekteplerge dúnyanıń abıraylı futbol klublarınan trenerler, sport medicinası hám farmakologiyası boyınsha maman qánigeler tartılǵan.
Futbolshılardı máhálleden baslap selekciyalaytuǵın sistema jaratıldı. Oǵan ayrıqsha jeńillikler engizilip, 9 mıńnan aslam máhálleniń 70 procentinde futbol ushın mini maydanshalar shólkemlestirildi.
Sonday-aq, 1,5 mıń mekteptiń futbol stadionları ońlanıp, 1 millionnan aslam oqıwshı hám máhálle jasları qamtıp alındı. Jaslar arasında máhállede, rayonlıq, wálayatlıq hám respublikalıq turnirlerdi dástúriy ótkeriw jolǵa qoyıldı.
Jarıslarda ózin kórsetken qábiletli jaslar futbol mekteplerine tikkeley qabıl etilmekte.
Bul háreketler óz nátiyjesin bere basladı.
– Futbol boyınsha olimpiada saylandı komandamız ótken jılı Parijdegi olimpiadada birinshi márte qatnastı. Tariyxımızda birinshi márte milliy saylandı komandamız kelesi jılı bolıp ótetuǵın jáhán chempionatına jollamanı qolǵa kirgizdi. Házirgi kúnlerde Qatarda bolıp atırǵan jáhán chempionatında on jeti jasqa shekemgi futbolshılarımız Aziya chempionı sıpatında mámleketimizdiń abırayın qorǵamaqta, – dedi mámleketimiz basshısı máresimde.
Búgin dúnyanıń túrli abıraylı klublarında oynap atırǵan 20 futbolshımızdıń ulıwma transfer bahası 60 million dollardan astı. Ásirese, ótken aydan baslap jerlesimiz Abduqodir Husanov Aziyanıń eń qımbat futbolshısına aylanǵanı hámmemizge maqtanısh baǵıshlaydı.
Bul nátiyjeler sońǵı jıllarda jaratılǵan imkaniyatlar esabınan milliy futbol mektebiniń xalıqaralıq dárejede tán alınıp atırǵanınan derek beredi.
– Jaqında FIFA prezidenti Janni Infantino mámleketimizge saparı dawamında Ózbekstanda futbolǵa itibar, jaratılǵan infrastruktura, basqarıw sistemasındaǵı reformalar menen jaqınnan tanısıp, usı sporttaǵı túpkilikli ózgerislerdi joqarı bahaladı. Mırza Infantino qızǵın sóylesiwimiz waqtında xalıqaralıq futbol jámiyetshiliginiń mámleketimizge bolǵan isenimi barǵan sayın artıp atırǵanı, Ózbekstan futbolı “Aziya grandları” dárejesinde ekenin ayrıqsha atap ótti, – dedi Prezident.
2-oktyabr kúni FIFA Keńesi májilisinde futbol boyınsha 20 jasqa shekemgiler arasında 2027-jılǵı jáhán chempionatın Ózbekstan hám Ázerbayjanda ótkeriw boyınsha qarar qabıl etildi.
Bul jáhán chempionatı sheńberindegi oyınlar eki mámlekettegi 3 ewden stadionda ótkeriledi. Jáhán chempionatlarınıń final hám yarım final oyınları sıyımlılıǵı 50 mıńnan aslam stadionda ótkeriliwi FIFA talaplarınan biri esaplanadı.
– Sonıń ushın, mámleketimiz futbolı ushın áhmiyetli joybar – Jańa Tashkent stadionınıń qurılısın baslaymız. Bahası 100 million dollarlıq bul stadion qurılısı ushın ne sebepten áyne Jańa Tashkent aymaǵı tańlandı? Óytkeni Jańa Tashkent keleshekte mámleketimizdiń jańa imkaniyatlar hám aldınǵı ideyalar orayına aylanadı, – dedi mámleketimiz basshısı.
Jańa Tashkent aymaǵındaǵı barlıq joybarlar zamanagóy arxitektura hám milliy qádiriyatlar únlesliginde ekologiyalıq hám “aqıllı basqarıw”ǵa tiykarlanıp qurılmaqta. Usı ulıwma koncepciya tiykarında qurılatuǵın jańa stadion da tábiyat penen únles boladı hám “jasıl energiya”, “aqıllı basqarıw” hám “qolaylı ortalıq” principlerine tiykarlanadı.
Jańa Tashkent stadionı FIFAnıń barlıq talaplarına muwapıq qurıladı hám Aziyadaǵı eń iri hám zamanagóy infrastrukturaǵa iye futbol maydanshalarınan biri boladı.
Bul imarat tek ǵana 2027-jılǵı 20 jasqa shekemgiler arasındaǵı jáhán chempionatı ushın emes, al pútkil ózbek futbolı hám jaslar sportınıń kelesi on jıllıq rawajlanıwı ushın xızmet etetuǵını atap ótildi.
Mámleketimizdiń jaslar arasındaǵı jáhán chempionatına basshılıq etiwi xalıqaralıq jámiyetshiliktiń Ózbekstanǵa bolǵan isenimi hám húrmetiniń jáne bir kórinisi ekenin atap ótiw kerek.
Usı múnásibet penen chempionatqa tayarlıq boyınsha óz aldına mámleketlik baǵdarlama qabıl etiletuǵını aytıldı. Infrastruktura, transport, miymanxana, medicinalıq xızmet hám volontyorlıq sistemaları boyınsha juwapker ministrliklerge anıq wazıypalar belgilep beriledi.
– Jańa Tashkent stadionı ushın házir biz qoyatuǵın tırnaq tası – búgingi miynetimizdiń hám erteńgi jeńislerimizdiń tiykarı. Bul úlken imarat jaslar ushın ilham, xalqımız ushın maqtanısh belgilerinen biri bolıp, elimizdegi millionlaǵan futbol ıqlasbentlerine úlken sawǵa bolatuǵınına isenemen, – dedi mámleketimiz basshısı.
Prezidentimiz Shavkat Mirziyoev Jańa Tashkent stadionınıń tırnaǵına kapsula qoyıp, qurılısın baslap berdi.

Ziyodulla JANIBEKOV,
Ikram AVVALBOEV,
ÓzAnıń xabarshıları