Prezident Shavkat Mirziyoev 11-noyabr kúni ekologiya hám qorshaǵan ortalıqtı qorǵaw tarawındaǵı jumıslardıń nátiyjeliligin arttırıw boyınsha usınıslardıń prezentaciyası menen tanıstı.

Keyingi jılları mámleketimizde tábiyattı qorǵaw, atmosfera hawasın jaqsılaw, jasıl aymaqlardı kóbeytiw hám klimat ózgeriwine beyimlesiw boyınsha keń kólemli jumıslar ámelge asırılmaqta. Biraq ámeldegi sistemadaǵı pıtırańqılıq, juwapkershilik hám wákilliklerdiń hár qıylı uyımlar arasında bólinip ketkeni sebepli jumıslardıń nátiyjesi de bárqulla kútilgen dárejede bolmay atır.
Usı múnásibet penen májiliste tarawda basqarıwdı jetilistiriw boyınsha islep shıǵılǵan usınıslar kórip shıǵıldı.
Qorshaǵan ortalıqtıń sapasın, qalalarda atmosfera hawasın jaqsılaw, jasıl aymaqlardı rawajlandırıw, tábiyatqa juwapkershilikli qatnastı qáliplestiriw hám tábiyǵıy miyrastı qorǵawǵa baylanıslı joybarlardı ámelge asırıw hám qarjılandırıwdı oraylasqan halda alıp barıw usınıs etildi.
Ekologiyalıq qadaǵalawdı ayrıqsha kózqaraslar tiykarında jolǵa qoyıw hám juwapker uyımlardıń wákilliklerin keńeytiw rejeleri haqqında maǵlıwmat berildi. Onda, tarawdaǵı qaǵıydabuzarlıqlarǵa qarsı operativ ilaj kóriw, tereklerdiń nızamsız kesiliwi, hawanıń pataslanıwınıń aldın alıw, jámiyetshiliktiń qatnasın keńeytiw mexanizmleri, sonday-aq, sanaatta ekologiyalıq tártipke salıwdı jetilistiriw hám elatlı punktlerde jasıl aymaqlardıń saqlanıwın támiyinlew ilajları kórip shıǵıldı.
Prezidentimiz bildirilgen usınıslardı maqullap, olardı basqarıwda sapa hám nátiyjelilikti jańa basqıshqa alıp shıǵıw, qadaǵalaw hám juwapkershilikti kúsheytiw kózqarasınan bunnan bılay da jetilistiriw boyınsha tapsırmalar berdi.

ÓzA