Ózbekstan Respublikası Prezidenti Shavkat Mirziyoev 11-noyabr kúni Rossiya Federaciyası Prezidenti Vladimir Putin menen telefon arqalı sóylesti.

Ózbekstan menen Rossiya arasındaǵı keń kólemli strategiyalıq sheriklik hám awqamlaslıq qatnasıqların joqarı dárejedegi kelisimlerdi ámelge asırıw sheńberinde bunnan bılay da rawajlandırıw hám bekkemlewdiń áhmiyetli máseleleri dodalandı.
Tovar almasıwdıń ósiw pátin saqlap qalıw, ekonomikanıń tiykarǵı tarmaqlarında kooperaciyanı, sonıń ishinde, energetika tarawındaǵı birgeliktegi joybarlardı alǵa qoyıw, aymaqlardıń isbilermenlik baylanısları hám mádeniy-gumanitarlıq almasıwdı keńeytiwge ayrıqsha itibar qaratıldı.
Usı jıl 22-oktyabr kúni Moskva wálayatında ótken Ózbekstan hám Rossiya aymaqları keńesiniń ekinshi májilisi nátiyjeli bolǵanı qanaatlanıwshılıq penen atap ótildi.
3-dekabr kúni bolatuǵın Ózbekstan – Rossiya Húkimetleraralıq komissiyasınıń gezektegi májilisi hám onıń sheńberinde birgeliktegi biznes forumın nátiyjeli ótkeriw áhmiyetli ekenligi atap ótildi.
Xalıqaralıq hám regionallıq áhmiyetke iye aktual máseleler boyınsha da pikir alısıldı, bolajaq ilajlardıń rejesi dodalandı.

ÓzA