Keshe Qatarda dawam etip atırǵan U-17 jastaǵı futbolshılar arasında dawam etip atırǵan jáhán chempionatında “J” toparında 3-tur oyınları bolıp ótti.

Doha qalasındaǵı «Aspire Academy» stadionında bolıp ótken Ózbekstan hám Panama saylandı komandaları arasında ótkerilgen oyınnıń birinshi taymında panamalı futbolshılar óz ústinliklerin kórsetip, bir qatar qáwipli hújimler shólkemlestirdi.
Usınday hújimlerdiń birinde saylandı komandamızdıń dárwazamanı Ibrahim Shokirov 11metrlik járiyma maydanı ishinde panamalı futbolshını qolı menen uslap qaldı hám bunı kórgen ukrainalı bas tóreshi Oleksey Derevinskiy hesh ekilenbesten penalti belgiledi.
Saylandı komanda quramında óziniń dáslepki oyının ótkerip atırǵan dárwazamanımız ushın oǵada qıyın ruwxıy soqqı boldı. Biraq, jas dárwazaman Ibrahim Shokirov bul qıyın jaǵdaydan óziniń sheberligi menen shıǵıp ketti hám panamalı futbolshı tárepinen tebilgen 11metrlik járiyma tobın qaytarıwǵa eristi.
Ekinshi taymda bolsa, Islam Ismailov shákirtleri oyındaǵı ústinlikti óz qollarına alıp, Panama dárwazası aldında bir qatar qáwipli hújimler shólkemlestirdi hám usınday hújimlerdiń birin 48-minutta Abubakir Shukurullaev nátiyjeli juwmaqlawǵa eristi.
Bunnan ruwxlanǵan futbolshılarımız jáne de óz sheberliklerin iske qosıp, oyınnıń 52, 67, 90+1, 90+3, 90+5-minutlarında 5 márte gol urıwǵa miyasar boldı.
Al, panamalı futbolshılar bolsa, bul gollarǵa 90+10-minutta bir mártebe juwap qaytarıwǵa eristi.
Esap 6:1.
Sonı aytıp ótiwimiz kerek, bul oyında respublikamız wákili Azizbek Erimbetov eki taym dawamında oynap, komandamız jeńisine óziniń salmaqlı úlesin qostı.
Al, usı toparda ótkerilgen ekinshi oyında bolsa, topar jetekshisi Irlandiya Paragvay saylandı komandası menen ushırasıp 0:0 oynadı hám topar basqıshın birinshi orın menen juwmaqladı.
Endi saylandı komandamız aǵzaları 1/16 final oyınında Xorvatiya saylandı komandası menen kelesi basqıshqa shıǵıw ushın óz-ara gúres alıp baradı.

Adilbay Orazov,
Qaraqalpaqstan xabar agentligi sholıwshısı