Búgingi kúnde elimizde túrli millet hám din wákilleri keńpeyillik, doslıq hám awızbirshilik principleri tiykarında tınısh hám tatıw turmıs keshirip atır. Mine usınday sociallıq turaqlılıqtı bekkemlew maqsetinde “Keńpeyillik hápteligi” sheńberinde barlıq aymaqlarda túrli mádeniy-aǵartıwshılıq ilajlar ótkerilmekte.

Olardan biri Tashkent fotosúwretler úyinde shólkemlestirilgen “Ózbekstan – keńpeyil diyar” atamasındaǵı fotokórgizbe bolıp esaplanadı.
Kórgizbede Milletleraralıq qatnasıqlar hám sırt eldegi watanlaslar máseleleri boyınsha komiteti hám milliy mádeniy oraylar, doslıq jámiyetleri menen birgelikte ótkerilgen ilajlar, elimizde jasap atırǵan túrli millet hám din wákilleriniń turmıs tárizi, mádeniyatı, úrp-ádetleri sáwlelendirilgen 100 den aslam shıǵarmalar kórsetildi.
— “Ózbekstan – keńpeyil diyar” atamasındaǵı fotokórgizbe elimizde túrli millet hám din wákilleri arasındaǵı keńpeyillik, doslıq hám awızbirshilikti sáwlelendiretuǵın áhmiyetli sociallıq ilaj bolıp xızmet etedi, – deydi Milletleraralıq qatnasıqlar hám sırt eldegi watanlaslar máseleleri boyınsha komiteti baslıǵınıń orınbasarı Olim Narzullaev. – Kórgizbede kórsetilgen 100 den aslam dóretpeler arqalı kelgenler elimizdegi mádeniy hár túrlilik hám tınıshlıq ortalıǵın seze aldı. Bunday ilajlar milletleraralıq tatıwlıqtı bekkemlew, ruwxıy baylıqtı qásterlep saqlaw hám barlıq áwladtı keńpeyillik ruwxında tárbiyalawda úlken áhmiyetke iye.

Nigora Rahmonova, ÓzA