Respublikalıq qánigelestirilgen onkologiya hám radiologiya ilimiy-ámeliy orayı hám onıń aymaqlıq filialları arasında gezektegi rejeli videokonferencbaylanıs májilisi bolıp ótti. Bul májilis Prezident kórsetpeleri tiykarında onkologiyalıq xızmetlerdi bunnan bılay da jetilistiriw, medicinalıq járdemniń sapasın arttırıwǵa qaratılǵan qararlardıń orınlanıwın dodalaw maqsetinde shólkemlestirildi.

Ilaj dawamında densawlıqtı saqlaw sistemasındaǵı áhmiyetli máseleler hár tárepleme tallanıp, 2026-jılǵa shekem mólsherlengen strategiyalıq rejeler dodalandı.
Májilis kún tártibindegi eń áhmiyetli máselelerden biri rak keselliklerin erte anıqlaw hám diagnoz qoyıw sistemasın kúsheytiw boldı. Qánigelerdiń atap ótiwinshe, onkologiyalıq keselliklerdi dáslepki basqıshta anıqlaw nawqaslardıń salamatlıǵın tiklew itimalın bir neshe esege arttıradı. Sol sebepli, oray hám filiallarda zamanagóy skrining baǵdarlamaların keńeytiw, xalıqtıń hár qıylı jas kategoriyaların turaqlı profilaktikalıq tekseriwlerden ótkeriw sistemasın bunnan bılay da jetilistiriw zárúrligin atap ótildi.
Medicina tarawındaǵı texnikalıq imkaniyatlar zaman menen únles bolıwı kerek. Usı kózqarastan, májiliste medicinalıq úskenelerden paydalanıw dárejesin arttırıw, bar texnologiyalardı tolıq quwatlılıqta iske qosıw, olardıń servis xızmetin turaqlı támiyinlew máseleleri dodalandı. Sonday-aq, jańa úskenelerdi alıp keliw menen bir qatarda, qánigelerdiń mamanlıǵın arttırıw, medicina xızmetkerlerin zamanagóy diagnostika hám emlew usıllarına oqıtıw máselesine de ayrıqsha itibar qaratıldı.
Májiliste ximiya terapiyası dári tayarlaw bólimleriniń jumısın jetilistiriw máselesi de áhmiyetli baǵdar sıpatında kóterildi. Bul baǵdarda orayda islep shıǵılǵan úlgi tártipler tiykarında barlıq aymaqlıq filiallarda standartlarǵa sáykes sharayatlar jaratıw, dári tayarlaw procesinde qáwipsizlik hám sapa qadaǵalawın kúsheytiw zárúr ekenligi atap ótildi.
Ilajda aymaqlar kesiminde rak keselliklerin tallaw, epidemiologiyalıq kórsetkishlerdi salıstırıw, statistikalıq maǵlıwmatlar tiykarında anıq ilajlar islep shıǵıw máseleleri kórip shıǵıldı.
Májilis dawamında oray hám onıń aymaqlıq filialları arasında óz-ara birge islesiwdi kúsheytiw, wákillik shegaralarına qatań ámel etiw zárúrligi de ayrıqsha atap ótildi. Bul bir tárepten, basqarıw nátiyjeliligin arttırsa, ekinshi tárepten, juwapkershilik hám qadaǵalaw sistemasın bekkemleydi.
Májilis juwmaǵında 2026-jılǵa shekem mólsherlengen strategiyalıq rawajlanıw baǵdarlamasınıń joybarı kórip shıǵıldı. Onda medicina infrastrukturasın modernizaciyalaw, jańa diagnostika orayların shólkemlestiriw, xalıqaralıq birge islesiwdi keńeytiw, sonday-aq, ilimiy-izertlew jumısın kúsheytiw máseleleri orın alǵan.
Respublikalıq qánigelestirilgen onkologiya hám radiologiya ilimiy-ámeliy medicina orayı tárepinen ótkerilgen videokonferencbaylanıs májilisi mámlekette onkologiyalıq xızmetlerdi jańa basqıshqa alıp shıǵıw jolındaǵı áhmiyetli qádemlerden biri bolıp esaplanadı. Májiliste belgilengen wazıypalardıń orınlanıwı, álbette, nawqaslar ushın sapalı, operativ hám qáwipsiz medicinalıq járdem kórsetiw sistemasın jetilistiriwge xızmet etedi.

Dildora DWSMATOVA, ÓzA