Qurılıs hám turaq jay kommunallıq xojalıǵı ministrligi hám sistemadaǵı shólkemlerdiń xızmetkerleri ushın KNAUF kompaniyası menen birgelikte seminar-trening shólkemlestirildi. Ilajda kompaniya wákilleri hám tarawǵa juwapker shólkemlerdiń juwapkerleri qatnastı.

Seminardıń tiykarǵı maqseti Ózbekstan aymaǵında qurılıp atırǵan imaratlarda órt qáwipsizligin támiyinlew, xalıqaralıq standartlarǵa tiykarlanǵan aldınǵı tájiriybelerdi úyreniw hám ámeliyatqa engiziwden ibarat boldı.
Ilajda Texnikalıq normallastırıw hám standartlastırıw ilimiy-izertlew institutı, Qurılıs hám turaq jay kommunallıq xojalıǵı tarawında qadaǵalaw inspekciyası, “Ashıq-aydın qurılıs” milliy málimleme sisteması hám Qala qurılısı hújjetlerin ekspertiza etiw Respublikalıq orayınıń wákilleri qatnastı.
Seminar dawamında órtke shıdamlılıq boyınsha ótkerilgen ámeliy sınaqlardıń nátiyjeleri, qurılıs materiallarınıń texnikalıq ózgeshelikleri hám olardıń qollanılıw tarawları hár tárepleme dodalandı. Sonday-aq, jergilikli sharayatta islep shıǵarılıp atırǵan janbaytuǵın materiallardan paydalanıw imkaniyatları hám normativlik talaplarǵa muwapıqlıqtı támiyinlewde sınaq hújjetleriniń áhmiyeti haqqında sóz etildi.
Seminarda kompaniyanıń Evropadan kelgen órt qáwipsizligi boyınsha jetekshi qánigeleri de qatnasıp, óz tájiriybesi menen ortaqlastı hám xalıqaralıq standartlarǵa tiykarlanǵan qatnaslardı usındı.
Ilaj juwmaǵında bul baǵdarda tájiriybe arttırıw treninglerin sistemalı túrde shólkemlestiriw, joybarlaw institutları hám texnikalıq qadaǵalaw uyımları qánigelerin oqıtıw máseleleri kelisip alındı.
Bul baslama taraw qánigeleriniń bilim hám kónlikpelerin arttırıw, qurılısta qáwipsizlik standartların joqarı dárejede támiyinlewge xızmet etedi.

Sh.Mamaturopova, ÓzA