Oliy Majlis Nızamshılıq palatasınıń májilisinde jazanı ótew múddetinen aldın shártli azat etilgen shaxslar ústinen qadaǵalaw mexanizmlerin jetilistiriwge qaratılǵan nızam joybarı birinshi oqıwda dodalandı.

Bul joybar boyınsha ishki isler ministriniń birinshi orınbasarı Ayubxon Rahmatullaev tolıq maǵlıwmat berdi:
– Ótken jılı qabıl etilgen “Probaciya haqqında”ǵı nızam menen probaciya institutı engizilgen edi. Bul jazanı ótep bolǵan yamasa jazanı ótew múddetinen aldın shártli azat etilgen shaxslardıń minez-qulqı ústinen nátiyjeli qadaǵalaw ornatıw arqalı olardı qayta tárbiyalaw, jámiyetlik turmısqa qaytıwı ushın sharayat jaratıw, qayta jınayat islewdiń aldın alıwda nátiyjeli qural bolıp xızmet etpekte. Bul nızam joybarı da mine usı jazanı ótewden shártli azat etilgen shaxslar ústinen nátiyjeli probaciya qadaǵalawın shólkemlestiriwdi jetilistiriwge qaratılǵan.
Jazanı ótewden múddetinen aldın shártli azat etiw institutı bar hám jaza ilajınıń bir baǵdarı esaplanadı. Bunıń ótelewin támiyinlew de probaciya bólimleri tárepinen ámelge asırıladı. Biraq, milliy nızamshılıǵımızda bunday jazaǵa húkim etilgenler ústinen qadaǵalaw mexanizmleri hám qadaǵalawshı subektlerdiń anıq wazıypaları belgilenbegen.
Sonlıqtan, joybar menen Jınayat kodeksiniń 73-statyasına shártli azat etilgen shaxslarǵa waqtı-waqtı qadaǵalawshı uyımlarǵa kelip dizimnen ótip turıw minnetlemesin júklew múmkin ekenligi názerde tutılmaqta.
Sonday-aq, nızam joybarı menen Jınayat-orınlaw kodeksi jańa 28/1-bap penen tolıqtırılıp, onda jazanı ótew múddetinen aldın shártli azat etilgen shaxslar ústinen probaciya qadaǵalawın ámelge asırıw, qadaǵalaw talapların buzǵan shaxslarǵa qosımsha minnetleme júklew yamasa jazanı qayta ótew, sonıń ishinde, shaxs moynınan ayırım minnetlemelerdi shıǵarıw haqqında sudqa usınıs kirgiziw tártibi hám tiykarları belgilenbekte.
Atap ótilgenindey, nızam joybarınıń qabıl etiliwi jazadan shártli azat etilgen shaxslar ústinen sistemalı hám nátiyjeli qadaǵalaw ornatıw imkaniyatın jaratadı, probaciya sistemasınıń huqıqıy tiykarların jáne de bekkemleydi. Sonday-aq, jámiyette tınıshlıq hám qáwipsizlikti támiyinlew, puqaralardıń nızamǵa boysınıwshılıq qatnasın kúsheytiw hám qaytadan jınayatlardıń aldın alıwda ayrıqsha áhmietke ie.
Qızǵın dodalaw hám soraw-juwaplardan soń nızam joybarı birinshi oqıwda qabıl etildi.

Muhtarama Komilova,
Asliddin ALIJANOV (súwret),
ÓzA