Áliysher Nawayı atındaǵı Ózbekstan Milliy kitapxanası tárepinen “INFOLIB O‘ZBEKISTON-2025” XIV Milliy málimleme-kitapxana hápteligi shólkemlestirildi.

2022-2026-jıllarǵa mólsherlengen Jańa Ózbekstannıń rawajlanıw strategiyasınıń 72-maqsetinde xalıqqa málimleme-kitapxana xızmetin kórsetiwdi bunnan bılay da rawajlandırıw, kitapqumarlıqtı keńnen ǵalaba en jaydırıw hám “Kitapqumar millet” ulıwma milliy ideyasın ámelge asırıw belgilengen. Házirgi waqıtta aymaqlarda xalıqqa málimleme-kitapxana xızmetin kórsetiwdi jetilistiriw, innovaciyalıq túrlerin hám málimleme-kommunikaciya texnologiyaların keńnen engiziw arqalı avtomatlastırılǵan kitapxana sistemasın jaratıw áhmiyetli baǵdarlardan esaplanadı.
Usı táreplerdi esapqa alǵan halda háptelik bir waqıttıń ózinde Ózbekstan Milliy kitapxanasında hám Qaraqalpaqstan Respublikası, wálayatlar hám Tashkent qalalıq málimleme-kitapxana oraylarında shólkemlestirildi.
– Mámleketimizde kitapqumarlıqtı rawajlandırıw ulıwma milliy háreketke aylanıp ketti, – dedi aǵartıwshılıq hápteliginiń ashılıwında Áliysher Nawayı atındaǵı Ózbekstan Milliy kitapxanası bas direktorı Umida Teshaboeva. – Prezidentimizdiń xalqımızdı kitapqumar milletke aylandırıw baǵdarındaǵı iygilikli baslamaları turmısta óziniń ayqın kórinisin tappaqta. Bul tárepler mine usınday aǵartıwshılıq háptelikleri dawamında jáne bir márte kózge taslanbaqta.
“INFOLIB O‘ZBEKISTON-2025” XIV Milliy málimleme-kitapxana hápteligin ótkeriwden gózlengen tiykarǵı maqset – elimizde málimleme-kitapxana tarawın bunnan bılay da rawajlandırıw, xalıqqa málimleme alıwdıń deregi, túri hám usılların jetkeriw, málimleme-kitapxana paydalanıwshılarına xızmet kórsetiw, kitapqumarlıq hám kitap oqıwdı úgit-násiyatlaw, intellektuallıq bilimi hám dárejesin arttırıwǵa baylanıslı ilajlar arqalı olardıń kitapxanalarǵa qızıǵıwshılıǵın arttırıwdan ibarat. Bul aǵartıwshılıq hápteligi taraw qánigelerine tarawǵa engizilgen zamanagóy, ilimiy-metodikalıq qollanbalar menen tanıstırıw imkaniyatın beretuǵını menen de áhmiyetli.
Milliy málimleme-kitapxana hápteligi sheńberinde jámiyetlik hám xalıqaralıq shólkemler menen birgelikte taraw qánigeleri hám kitapqumarlar ushın bir qatar ruwxıy-aǵartıwshılıq ilajlar, seminarlar, dógerek sáwbetleri, tańlawlar, treningler, sheberlik sabaqların ótkeriw jáne basılımlardıń qatnasıwında kitap kórgizbeleri, yarmarkaların shólkemlestiriw, qánigelerdiń ruwxıy-mádeniy bilimlerin arttırıwǵa baylanıslı ilajlar, sheberlik sabaqları, viktorinalar, belgili ilim hám mádeniyat ǵayratkerleri, kórkem óner ǵayratkerleriniń qatnasıwında dóretiwshilik ushırasıwlar, teatrlastırılǵan shıǵıwlar kórsetiw rejelestirilgen.
Háptelik sheńberinde jas áwladtıń kitap oqıwǵa bolǵan qızıǵıwshılıǵın hár tárepleme qollap-quwatlaw maqsetinde “Jańa Ózbekstan kitapxanashıları – jańa kúsh, jańa imkaniyatlar, jańa shekler” súreni astında V Jas kitapxanashılar forumı ótkerilmekte.
Forumnıń maqseti zamanagóy talaplarǵa juwap beretuǵın tabıslı kitapxana-málimleme jumısı ushın zárúr bolǵan jeke hám kásiplik kompetenciyalardı, bilim, tájiriybe hám kónlikpelerdi rawajlandırıw ushın sharayat jaratıw, jas kitapxana qánigeleri arasında kásiptiń abırayın arttırıw hám jámiyette kitapxanashı hám kitapxanalardıń unamlı imidjin jaratıwdan ibarat. Sonıń menen birge, bul forum kitapxana jumısın shólkemlestiriwde innovaciyalıq joybarlardı tarawǵa engiziw ushın jaslardıń kásiplik belsendiligin xoshametlewdi de názerde tutadı.
Bıyılǵı forum sheńberinde qońsı mámleketler kitapxanalarınıń unamlı tájiriybesin úyreniwge baǵıshlanǵan sáwbetler, jas kitapxanashı qánigelerdiń qatnasıwında kásiplik rawajlanıwǵa baylanıslı pikirlesiw, kitapxanashılıq tarawında málimleme texnologiyaları jańalıqları, “Dóretiwshi kitapxanashı” rubrikasında súwret salıw boyınsha tańlawlar, kitapxana menedjmenti, “Intellektuallıq qúdiretke iye jaslarımız”, “Jańa Ózbekstanımızdıń rawajlanıw aynası”, “Zıyalı jaslar eldiń tayanıshı”, “Jasalma intellekt paydalı ma yamasa zıyanlı ma?..” temalarında seminar-treningler ótkeriledi.
Kásiplik sheberlik kúninde “Edo.ijro.uz sisteması haqqında tiykarǵı túsinikler hám onnan qalay paydalanıw usılları ” “Jasalma intellekt…..” , “Óz joybarıńdı ámelge asır….” atamısında trening hám sheberlik sabaǵı, intelektuallıq potencialdı arttırıwǵa qaratılǵan ilajlar ótkeriw rejelestirilgen.
Milliy málimleme-kitapxana hápteligi dawamında “IFLA (Xalıqaralıq kitapxanashılar associaciyasi) grantları: Jas kitapxanashılar ushın xalıqaralıq tájiriybealmasıw imkaniyatı ” atamasında seminar-treningler bolıp ótedi.

Nazokat Usmonova, ÓzAnıń xabarshısı