Hár jılı 11-noyabr kúni mámleketimizde Ózbekstan kásiplik awqamları kúni keńnen belgilenedi. Bul sáne miynetkeshlerdiń mápin qorǵaytuǵın, jámiyette ádillik hám awızbirshilik ideyaların bekkemleytuǵın áhmiyetli sociallıq institut – kásiplik awqamlarınıń jumısın tán alıw kúni sıpatında ayrıqsha áhmiyetke iye.

Búgingi kúnde Ózbekstanda “Insan qádiri ushın” principi mámleketlik siyasattıń tiykarǵı baǵdarına aylanǵan. Bul ideya tek ǵana siyasiy súren emes, al hár bir puqaranıń miynetin, huqıqın hám turmıs dárejesin jaqsılawǵa qaratılǵan ulıwma xalıqlıq háreketi sıpatında qáliplespekte. Mine, usı baǵdarda kásiplik awqamlarınıń jumısı áhmiyetli orın iyeleydi. Olar miynet jámáátleri, jumıs beriwshiler hám mámleket arasında sociallıq sheriklik principine tiykarlanǵan qatnasıqlardı qáliplestirip, xızmetkerlerdiń miynet, sociallıq-ekonomikalıq hám huqıqıy máplerin qorǵaydı.
Kásiplik awqamları búgingi reformalar procesinde insan máplerin orayǵa qoyǵan siyasattıń tikkeley orınlawshısına aylanbaqta. Bul shólkemler hár bir xızmetkerdiń jeke mashqalası jámiyet mashqalasına aylanıwı múmkin ekenligin tereń ańlap, sociallıq ádillik principin bekkemlewge xızmet etpekte. Sonlıqtan, 11-noyabr – Ózbekstan kásiplik awqamları kúni tek ǵana bir taraw wákilleriniń bayramı emes, al miynetke, insan qádiri hám sociallıq tatıwlıqqa húrmet bayramı bolıp esaplanadı!

Dildora DWSMATOVA,
ÓzAnıń xabarshısı