Insan tárbiyasında álbette, bárinen burın, shańaraq úlken áhmiyetke iye. Biraq jámiyet dep atalatuǵın úlken turmıs shınjırı da adamnıń minez-qulqınıń ózgeriwine alıp keliwi múmkin. Ásirese, bunda jasaw ortalıǵı degen túsinik tiykarǵı itibarda boladı.

Biz jasap atırǵan barlıqta hár qıylı minezli insanlar bar. Olar menen bizdi qanday da bir jámiyettegi rol yamasa status birlestiredi. Máselen, studentlikte kurslas, miynet jolında kásiples hám t.b. Ortalıq túsinigi mine usı processlerde óz sózin aytadi.
Jaslardıń minez-qulqı unamsız tárepke ózgergende geyde onıń átirapındaǵılar ayıplı dep qaraw jaǵdaylarınıń gúwası bolamız. Negizinde bunıń da ózine jarasa haqıyqatı bar.
– Adamzat bir-birine ayrıqsha tásir kórsete alıw qásiyeti menen jaratılǵan. Sonıń ushın da kekselerimiz “Jaqsıǵa jantas, jamannan qash”, degen tilekti kóp tákirarlaydı. Ásirese, perzentlerimizdiń jaqsı ortalıqta bilimli teńlesleri menen jasap atırǵanı oǵada áhmiyetli, – deydi Tashkent qalasında jasaytuǵın jerlesimiz, shayır Ozoda Bekmurodova.
Kórinip turǵanınday, biz átirap penen, átirap bolsa biz benen tikkeley baylanıslı. Solay eken, bárqulla jaqsılar menen birge bolıwǵa, barlıqqa da jaqsılıq úlestiriwge umtılıp jasawǵa ne jetsin? Negizinde, gózzal ortalıq gózzal jámiyetti qáliplestiredi.

Sherbek Islamov,
ÓzA