“Medicinalıq buyımlar – Sapa menedjmenti sistemaları – Tártipke salıw maqsetleri ushın talaplar” standartı tastıyıqlandı
Búgingi kúnde Ózbekstanda farmacevtika hám medicinalıq úskeneler tarawında izbe-iz reformalar ámelge asırılmaqta.

Mámleketimiz tárepinen xalıqqa sapalı, qáwipsiz ónimler jetkerip beriw, jergilikli islep shıǵarıwshılardı qollap-quwatlaw jáne olardıń dúnya bazarındaǵı básekige shıdamlılıǵın arttırıwǵa ayrıqsha itibar qaratılmaqta.
Globallıq bazar talaplarına sáykes milliy standartlardı engiziw – mámlekettiń farmacevtika tarmaǵın turaqlı rawajlandırıw hám eksport potencialın arttırıwdıń áhmiyetli faktorı bolıp esaplanadı. Usı maqsette, Ózbekstan Respublikası Prezidentiniń 2025-jıl 19-avgustta “Dári quralları hám medicinalıq úskeneler aylanısın tártipke salıwǵa baylanıslı qosımsha ilajlar haqqında”ǵı pármanı qabıl etildi.
Usı pármannıń 9-bántine muwapıq, Ózbekstan Texnikalıq jaqtan tártipke salıw agentligine Densawlıqtı saqlaw ministrligi menen birgelikte eki ay múddette “ISO 13485 – Medicinalıq ásbap-úskeneler ushın sapa menedjmenti sistemaları” xalıqaralıq standartınıń talaplarına beyimlestirilgen milliy standarttı islep shıǵıw hám tastıyıqlaw wazıypası júklengen edi.
Nátiyjede, 2025-jıl 30-sentyabrde ÓzMSt ISO 13485:2025 (ISO 13485:2016, IDT)- “Medicinalıq buyımlar – Sapa menedjmenti sistemaları – Tártipke salıw maqsetleri ushın talaplar” Ózbekstan milliy standartı mámleketlik dizimge kirgizildi hám 2025-jıl 30-oktyabrden baslap ámeliyatqa engizildi.
Bul standart medicinalıq úskenelerdiń qáwipsizligi hám sapası ústinen qadaǵalawdı kúsheytiw, densawlıqtı saqlaw sistemasınıń nátiyjeliligin arttırıw hám Ózbekstannıń xalıqaralıq farmacevtika bazarındaǵı abırayın bekkemlewge xızmet etedi.
Jergilikli islep shıǵarıwshılar ushın ÓzMSt ISO 13485:2025 (ISO 13485:2016, IDT) standartı jáhán talaplarına sáykes ónim islep shıǵıw, eksport potencialın keńeytiw hám óndiris processlerin jetilistiriw imkaniyatın jaratadı.
Sonıń menen birge, medicinalıq úskenelerdi xalıqaralıq standartlar tiykarında sertifikatlaw arqalı nawqaslardıń qáwipsizligi kepillenedi, xalıqtıń isenimi hám qanaatlanıwshılıǵı artıp baradı.
Usı párman tiykarında qabıl etilgen ÓzMSt ISO 13485:2025 (ISO 13485:2016, IDT) milliy standartı – mámleketimizde medicinalıq úskenelerdiń sapasın hám qáwipsizligin támiyinlew, jergilikli islep shıǵarıwshılardı xalıqaralıq bazarǵa alıp shıǵıw hám xalıqtıń salamatlıǵın qorǵaw jolındaǵı áhmiyetli qádem bolıp esaplanadı.

Mohigul Qosimova, ÓzA