Mámleketimiz basshısınıń baslaması tiykarında elimizde úsh basqıshtan ibarat “Prezident Olimpiadası” sport jarıslarınıń jolǵa qoyılǵanı qábiletli jaslardı tańlap alıwdıń jańasha sistemasın júzege keltirdi.

Watanımızdıń sport abırayın xalıqaralıq maydanlarda múnásip qorǵaytuǵınlar qatarın jáne de keńeytiwge xızmet etetuǵın bul sport jarıslarınıń birinshi basqısh jarısları – “Jańa Ózbekstan Olimpiada shıńları” oyınları usı jıldıń may, iyun hám avgust ayları dawamında joqarı dárejede shólkemlestirildi. Jeńil atletika, taekvondo, erkin gúres, grek-rim gúresi, kórkem gimnastika, stol tennisi, boks, dzyudo, awır atletika, basketbol 3×3 boyınsha sheber jaslar usı jılı noyabr ayınıń úshinshi on kúnligi hám dekabr ayınıń birinshi on kúnliginde “Prezident Olimpiadası” sport jarıslarında bellesedi.
Sport ministrligi, Milliy olimpiada komiteti juwapkerleri, qánigeler, federaciya wákilleriniń qatnasıwında “Prezident Olimpiadası” sport jarısların joqarı dárejede ótkeriwge baǵıshlanǵan májiliste paytaxtımızdaǵı “Olimpiada qalashası” hám orınlarda shólkemlestiriletuǵın jarıs obektlerinde sportshılar ushın zárúr sharayatlardı jaratıw, jumısshı toparlar tárepinen belgilengen baǵdarlar boyınsha jumıslardı shólkemleskenlik penen shólkemlestiriw, qáwipsizlik ilajların kóriw hám jarıs processlerinde ashıq-aydınlıqtı támiyinlew máseleleri kórip shıǵıldı.
Dodalawlar dawamında “Jańa Ózbekstan Olimpiada shıńları” jarıslarınıń aymaqlıq basqıshında 6 mıń 500 den aslam hám Tashkent qalalıq basqıshında 800 ge shamalas sportshılar qatnasıp, olardıń 517 i “Prezident olimpiadası”nda qatnasıw huqıqın qolǵa kirgizgeni atap ótildi.
Bildirilgen pikir-usınıslar tiykarında “Prezident olimpiadası” jarıslarınıń hár tárepleme joqarı dárejede, ádil ótiwin támiyinlewde ulıwma esapta 27 den aslam tóreshiler jumıs alıp barıwı belgilengeni aytıp ótildi.
“Prezident Olimpiadası” sport jarısların joqarı dárejede shólkemlestiriw boyınsha juwapkerlerge tiyisli kórsetpe hám usınıslar berildi.

T.Rwziev,
ÓzA