Bul haqqında Sanaat, radiaciya hám yadro qáwipsizligi komitetiniń málimleme xızmeti xabar berdi. Onda atap ótiliwinshe, Ózbekstan Vena konvenciyasına qosılıw ushın zárúr hújjetti rásmiy túrde tapsırdı. Bul qádem mámlekettiń yadrolıq tarawdaǵı xalıqaralıq birge islesiwin bekkemlewde úlken áhmiyetke iye.

Usı múnásibet penen Venada shólkemlestirilgen ilajda Ózbekstan Respublikasınıń Avstriyadaǵı elshixanası juwapkerleri hám Xalıqaralıq atom energiyası agentligi (MAGATE) bas direktorı Rafael Grossi qatnastı.
Ushırasıwda Ózbekstan tárepi MAGATE bas direktorı Rafael Grossige Yadrolıq zıyan ushın puqaralıq juwapkershilik haqqındaǵı Vena konvenciyasına qosılıw haqqındaǵı hújjetti rásmiy túrde tapsırdı. Bul qádem mámleketimizdiń yadrolıq tarawda xalıqaralıq standartlar hám qaǵıydalarǵa muwapıq jumıs alıp barıwdaǵı tiykarǵı baǵdarlarınan biri bolıp esaplanadı.
MAGATE bas direktorı óziniń shıǵıp sóylegen sózinde Ózbekstannıń qısqa múddet ishinde yadrolıq tarawdaǵı tórt tiykarǵı xalıqaralıq konvenciyaǵa qosılǵanın ayrıqsha atap ótti hám mámleketimizge xalıqaralıq birge islesiwdegi jedel háreketleri ushın minnetdarshılıq bildirdi.
Vena konvenciyasına qosılıw Ózbekstan ushın bir qatar áhmiyetli imkaniyatlar hám ústinliklerdi támiyinleytuǵının atap ótiw kerek. Olardıń arasında yadrolıq energiyadan qáwipsiz hám nátiyjeli paydalanıw, yadrolıq zıyan hám texnikalıq avariyalardan kelip shıǵatuǵın ekonomikalıq hám huqıqıy mashqalalardı xalıqaralıq standartlar tiykarında sheshiw, sonday-aq, yadrolıq infrastrukturalardıń xalıqaralıq kólemde isenimliligin arttırıw sıyaqlı tárepler ayrıqsha áhmiyetke iye.
Sonıń menen birge, Ózbekstan xalıqaralıq maydanda yadrolıq qáwipsizlik hám juwapkershilik tarawında isenimli sherik sıpatında tán alınadı. Bul bolsa mámleketimizge xalıqaralıq investiciyalar hám texnologiyalıq joybarlardı ámelge asırıwda qosımsha abzallıqlar jaratadı, yadrolıq energetika tarawında qáwipsizlik hám ashıq-aydınlıqtı támiyinleydi.
Bul qádem mámlekettiń yadrolıq energetika tarawındaǵı siyasatın xalıqaralıq standartlar tiykarında bekkemleydi hám xalıqtı jáne qorshaǵan ortalıqtı qorǵawdaǵı nızamshılıq bazasın bunnan bılay da jetilistiriw imkaniyatın beredi.

N.Ziyodullaeva, ÓzA