Adamzat dúnyaǵa mehir menen keledi. Biraq onıń qálbindegi bul mehirdi saqlap qalıw, onı keńpeyillik penen bayıtıw hár kimniń tárbiyasına baylanıslı. Búgin dúnyada túrli milletler, dinler hám mádeniyatlar birge jasaytuǵın sharayatta keńpeyillik tek ǵana sóz yamasa súren emes, al tınıshlıq hám tatıwlıqtıń tiykarǵı kepilligine aylanǵan.

Keńpeyillik – bul basqalardı ózimizdey qabıl etiw, pikirine, isenimine, kelip shıǵıwına qaramastan insan sıpatında qádirlew pazıyleti. Ol tek ǵana húrmet hám kelisimdi emes, al adamlardıń qálbin jaqınlastıratuǵın ruwxıy kópirdi ańlatadı.
Usı jaǵınan da keńpeyillik xalqımızǵa tán áyyemgi hám ázeliy pazıylet bolıp esaplanadı. Ata-babalarımız ásirler dawamında “Birlik bar jerde bereket bar” degen turmıslıq hikmetke ámel etip, túrli millet hám din wákillerine bárqulla ashıq kewil hám shın júrekten qatnas jasap kelmekte.
BMSh Bas Assambleyasınıń qararına muwapıq, 1997-jıldan berli 16-noyabr hár jılı pútkil dúnyada “Xalıqaralıq keńpeyillik kúni” sıpatında belgilenip kelinedi. Bul sáneni Ózbekstanda belgilew de jaqsı dástúrge aylanǵan. Ullı Jipek jolı kesilispesinde jaylasqan Ózbekstan ázelden túrli millet, xalıq hám din wákilleriniń tınısh, óz-ara húrmet hám awızbirshilik ortalıǵı menen tatıw jasap kelgen mákan sıpatında tán alınadı.
Házirgi kúnde elimizde 130 dan aslam millet hám xalıq, 16 diniy konfessiya wákilleri keńpeyillik, doslıq hám awızbirshilik principleri tiykarında jasap kelmekte.
Búgin elimizdiń barlıq aymaqlarında milletleraralıq hám dinleraralıq doslıq, tatıwlıq hám awızbirshilikti bekkemlewge qaratılǵan hár qıylı ilajlardı ózinde jámlegen “Keńpeyillik hápteligi” ilajlarına start berildi.
Hápteliktiń dáslepki ilajı “Jańa Ózbekstan” baǵındaǵı Ǵárezsizlik monumentine gúl qoyıw máresiminen baslandı. Ǵárezsizlik monumenti mámleket azatlıǵı hám turaqlılıǵı belgisi esaplanadı. Onda Ózbekstan xalqınıń kóp ásirlik mámleketshilik tariyxı, ullı oyshıl hám jawınger babalardıń tulǵaları sáwlelengen. Esteliktiń eń joqarı bóliminde Qumay qusı súwretlengen.
Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komiteti hám Ózbekstan Respublikası Din isleri boyınsha komiteti basshıları hám xızmetkerleri, milliy mádeniy oraylar hám doslıq jámiyetleriniń belsendileri, diniy konfessiya wákilleri, ǴXQ xızmetkerleri jáne keń jámiyetshilik qatnasqan “Keńpeyillik marshı”nan soń monumentke gúller qoyıldı.
Bunnan soń “Jasıl mákan” ulıwma milliy joybarı sheńberinde túrli millet hám din wákilleriniń qatnasıwında “Jańa Ózbekstan” baǵında terek nállerin egiw máresimi ótkerildi. Máresimde túrli millet hám din wákilleri birgelikte jaqsı niyet etip, shınar nállerin ekti.
Usı jıldıń 10-15-noyabr kúnleri mámleketimiz boylap ótkeriletuǵın “Keńpeyillik hápteligi” ilajları sheńberinde respublikamızdıń barlıq wálayatları hám Tashkent qalasındaǵı abıraylı kórkem óner sarayları, teatrlar, koncert zalları, tamasha maydanları hám sulıw qıyabanları jáne baǵlarda túrli mádeniy-aǵartıwshılıq, ilimiy-ámeliy ilajlar rejelestirilgenin atap ótiw kerek.

N.Rahmonova, N.Abduvoitov (video), U.Twxtaev (montaj) ÓzA