Ózbekstan elshixanası Islamabad strategiyalıq izertlewler institutı (ISSI) menen birgelikte pakistanlı belgili ekspert, “Qubla Aziya izertlewleri hám xalıqaralıq qatnasıqlar” tallaw orayınıń atqarıwshı direktorı Mahmud ul-Hasan Xannıń “Shavkat Mirziyoev – reformalar hám regionallıq integraciyanıń ullı jetekshisi” (Shavkat Mirziyoyev: Great Leader of Reforms and Regional Integration”) atamasındaǵı kitabınıń prezentaciya máresimin ótkerdi.

Usı mámlekettiń milliy miyras hám mádeniyat federal ministri Avrangzeb Xan Kichiy tiykarǵı miyman sıpatında qatnasqan ilajǵa ministrlikler, uyımlardıń basshıları, parlament palatalarınıń aǵzaları, Islamabadtaǵı diplomatiyalıq korpus wákilleri, biznes hám ilimiy-akademiyalıq toparlar, ǵalaba xabar qurallarınıń xızmetkerleri, sonday-aq, Islamabad hám qalaǵa tutas aymaqlarda jasaytuǵın watanlaslar hám keń jámiyetshilik qatnastı.
Prezentaciyanı ISSI bas direktorı Suhayd Mahmud qutlıqlaw sózi menen ashtı.
Ol bul akademiyalıq ilaj instituttıń imaratında shólkemlestirilgeninen quwanıshlı ekenin, bul barǵan sayın jedellesip atırǵan sheriklik ruwxına sáykes keletuǵının atap ótti.
ISSI basshısı kitaptıń áhmiyetine toqtap ótip, bir-birin mazmunı boyınsha tolıqtıratuǵın, logikalıq izbe-izlikte jaylastırılǵan 39 túrli temadaǵı analitikalıq materiallar arqalı Ózbekstanda siyasiy, sawda-ekonomikalıq, sociallıq, mádeniy tarawlarda alıp barılıp atırǵan reformalar hám modernizaciya procesi, ashıq-aydın, pragmatikalıq sırtqı siyasattıń mánisi ashıp berilgenin atap ótti.
– 2022-2026-jıllarǵa mólsherlengen Jańa Ózbekstannıń rawajlanıw strategiyası hám basqa da konceptuallıq hújjetlerde xalıqtıń erteńgi kúnge bolǵan isenimi, erk-ıqrarı, Húkimettiń mámleketti rawajlandırıwǵa baylanıslı áhmiyetli baslamaları, sociallıq mámleket qurıw principi qamtıp alınǵan,- dedi S.Mahmud. – Bul kitapta usı hújjetlerdiń mazmun-mánisi hám áhmiyeti tolıq sáwlelendirilgen.
Elshi Alisher Twxtaev qısqa waqıt ishinde Islamabadda Ózbekstan haqqında eki áhmiyetli kitap – 16 oktyabrde Muhammad Abbos Xannıń “Uzbekistan: The Third Renaissance – The Concept of the Future” hám endi Mahmud ul-Hasan Xanning “Shavkat Mirziyoyev: Great Leader of Reforms and Regional Integration” atamasındaǵı shıǵarmalarınıń keń jámiyetshilikke usınılǵanı Pakistan ilimiy-akademiyalıq topar wákilleri arasında mámleketimizge qızıǵıwshılıq artıp atırǵanınan derek beretuǵının atap ótti.
“Mahmud ul-Hasan Xan shıǵarmasında Prezident Shavkat Mirziyoevtiń basshılıǵında elimizde artqa qaytpaytuǵın process – makroekonomikalıq reformalar, finanslıq liberallastırıw, kámbaǵallıqtı qısqartıw, sırtqı siyasat, mádeniy diplomatiya hám regionallıq integraciya sıyaqlı máseleler hár tárepleme sáwlelendirilgen, – deydi elshimiz. – Ózbekstan basshısınıń sózi menen aytqanda, “reformalar statistika ushın emes, insan qádiri, abırayı hám keleshegi ushın” principine súyengeni, “Jańa Ózbekstan” ideyasın turmısqa engiziw ámeliy strategiyaǵa aylanǵanı, sanlı ekonomika, “jasıl” energetika, sırt el investiciyasın tartıw hám jaslar ushın jańa jumıs orınların jaratıw baǵdarında salmaqlı jetiskenliklerge erisilip atırǵanı tereń tallanǵan.
Diplomatiyalıq missiya basshısı, sonday-aq, Ózbekstan Prezidenti Shavkat Mirziyoev hám Pakistan Bas ministri Shahboz Sharif qáwenderliginde eki mámlekettiń strategiyalıq sherikligi sapa jaǵınan jańa basqıshqa kóterilgenin atap ótti. Tárepler Oraylıq hám Qubla Aziyanı baylanıstıratuǵın strategiyalıq joybarlar, sonıń ishinde, Transawǵan temir jolın qurıw ústinde izbe-iz birge islesip atırǵanı, óz-ara sawdanı 2 milliard dollarǵa jetkeriw boyınsha ilajlar islep shıǵılıp atırǵanı atap ótildi.
Ministr Avrangzeb Xan Kichiy elimizde ámelge asırılıp atırǵan reformalar procesin, jámiyetlik turmıstı jańalaw, xalıqtıń abadanlıǵın arttırıw, sociallıq baǵdarlanǵan siyasattı jáne de bekkemlewdi “Rawajlanıwdıń Ózbekstan modeli”, – dep atadı.
– Tashkentke saparım waqtında reformalardıń nátiyjesine tikkeley gúwa boldım, – dedi xızmetker. – Biz globallıq dúnyada jasap atırmız. Álbette, qońsılas region, atap aytqanda, Ózbekstandaǵı unamlı waqıya bizde de óz kórinisin tabadı. Óz-ara sawdanı basqıshpa-basqısh arttırıw, sistemalı qospa joybarlar arqalı bolsa bir-birimizge jáne de jaqınlasamız. Pakistan húkimeti bul processte Prezident Shavkat Mirziyoevtiń baslamaların joqarı qádirleydi.
Avtor Mahmud ul-Hasan Xan óz gezeginde kitaptı jazıwdan tiykarǵı maqset Ózbekstanda mámleket basshısı basshılıǵında ámelge asırılıp atırǵan reformalardıń mazmun-mánisin ashıp beriw, bul háreketlerdiń regionallıq birge islesiw hám integraciya procesine tásirin ilimiy tallaw, Pakistan jámiyetshiliginiń bul processten xabardarlıǵın arttırıw ekenin atap ótti.
– Ózbekstan jetekshisiniń Transawǵan temir jolı hám energetika joybarları baǵdarındaǵı baslamaları Oraylıq hám Qubla Aziyanı qayta baylanıstıratuǵın strategiyalıq integraciyalıq platformanı jarattı, – dedi ol. – Bul joybarlar regionlararalıq transport-logistika sisteması hám ekonomikalıq baylanıslardı kúsheytiwge de xızmet etpekte.
Ánjumanda shıǵıp sóylegen basqa ekspertler de Prezident Shavkat Mirziyoevti mámleket ishinde reformalar procesin basqarıp atırǵan, regionda bolsa integraciya ideyasın alǵa qoyıp, ámeliyatqa engizip atırǵan zamanagóy basshı sıpatında bahaladı. Bul kitap Ózbekstannıń aldınǵı tájiriybesin en jaydırıw menen birge eki xalıqtıń doslıǵı hám óz-ara baylanıslılıǵın bunnan bılay da bekkemlewge xızmet etetuǵını atap ótildi.
Said Amir Xolid Jaffriy, “Qubla Aziya izertlewleri hám xalıqaralıq qatnasıqlar” tallaw orayınıń basshısı:
– Keyingi waqıtta Pakistanda Ózbekstan menen baylanıslı ilajlardıń kóbeygeni eki tárepleme qatnasıqta jańa basqısh baslanıp, óz-ara qızıǵıwshılıq artqanınan derek beredi.
2016-jılı yarım jabıq, regionallıq integraciya procesine kemirek qatnasatuǵın mámleket basqarıwına kelgen Shavkat Mirziyoev óziniń sırtqı siyasatınıń dáslepki basqıshında Oraylıq Aziyadaǵı mámleketleraralıq qatnasıqlarda isenim hám birge islesiwdi bekkemlew, keyin ala bolsa Qubla Aziya menen óz-ara baylanıslılıqtı qayta tiklew baǵdarında isenimli erk-ıqrar kórsetti. Mámleket ishinde sociallıq baǵdarlanǵan ekonomikalıq reformalarǵa tiykarǵı itibar qaratılıp, básekige shıdamlı, zaman talabı dárejesinde jetilistirilip atırǵan milliy rawajlanıw sisteması qáliplestirildi. Prezidenttiń jańasha siyasatı nátiyjesinde mámleket jasları dúnya kóleminde ilimiy-akademiyalıq, ilim, mádeniyat, sport, kórkem óner, zamanagóy texnologiya sıyaqlı áhmiyetli tarawlarda úlken jetiskenliklerdi qolǵa kirgizbekte. Sóz hám ǴXQ erkinligi baǵdarında da unamlı ózgerisler baqlanbaqta. Erisilip atırǵan úlken nátiyjelerdiń artında Prezidenttiń mámleketlik basqarıwdaǵı kóp jıllıq tájiriybesi, sonıń ishinde, 2 wálayatqa hákimlik, 13 jıl húkimetti basqarıw dawamında alıp barılǵan tereń baqlawları, mámlekettiń mashqalaların ish-ishinen jaqsı túsiniwi hám seziniw qábileti jatır.
Adam Saud, Baxriya universiteti dekanı:
– Oraylıq Aziya, sonıń ishinde, Ózbekstan haqqında pikir bildiriw adamǵa bárqulla úlken juwapkershilik júkleydi. Hár saparı Ózbekstanǵa barǵanımda úlken ózgerislerdiń gúwası bolaman. Bul quwanıshlı, álbette. 2017-jıl usı mámlekettiń sırtqı siyasatındaǵı ózgerisler tiykarında jaqın keleshekte erisiletuǵın nátiyjeler haqqında prognoz-maqala jazǵanman. Búgingi kúnge kelip, sol maqalada keltirilgen boljawlardıń 85 procenti haqıyqatqa aylandı. Qalǵanları boyınsha da qızǵın jumıs dawam etpekte.

Ǵ.Xonnazarov tayarladı. ÓzA