Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń delegaciyası Qıtay Xalıq Respublikasınıń Sinczyan-Uyǵur avtonom rayonınıń orayı Urumchi qalasında ótkerilgen xalıqaralıq ilimiy seminar hám “Qıtay – Oraylıq Aziya” 12-forumında belsene qatnastı.

Ilajlar Shinjon awıl xojalıǵı universiteti tárepinen shólkemlestirilgen bolıp, ol Oraylıq Aziya hám Qıtay arasında ilimiy birge islesiwdi rawajlandırıw, tájiriybe almasıw hám birgeliktegi joybarlardı ámelge asırıwǵa qaratılǵan.
Seminarda delegaciya basshısı, filial direktorı A.Esimbetov shıǵıp sóylep, Ózbekstan hám Qıtay arasındaǵı doslıq baylanıslar hám bilimlendiriw, ilimiy birge islesiwdiń jańa basqıshqa kóterilip atırǵanın atap ótti.
Seminar dawamında awıl xojalıǵı, sharwashılıq, haywanlar salamatlıǵı, azıq-awqat qáwipsizligi hám biotexnologiyalar baǵdarındaǵı ilimiy temalar hár tárepleme dodalandı. Qatnasıwshılar ushın laboratoriya kórgizbeleri, ámeliy sabaqlar hám tájiriybe almasıw sessiyaları shólkemlestirildi. Professor A.Esimbetov “Qaraqalpaqstanda awıl xojalıǵın rawajlandırıw arqalı kámbaǵallıqtı qısqartıwdıń tabıslı modelleri hám kózqarasları” atamasında ilimiy bayanat jasadı. Izertlewlerge tiykarlanǵan bayanat tek ǵana aymaqlıq agrar reformalardıń nátiyjelerin ashıp bermey, al keleshektegi innovaciyalıq joybarlar hám birgeliktegi ilimiy baslamalardı alǵa qoyıw imkaniyatın jarattı.
Delegaciya Shinjon awıl xojalıǵı universitetiniń zamanagóy veterinariya klinikası hám ilimiy-izertlew laboratoriyalarınıń jumısı menen de jaqınnan tanıstı. Delegaciya “Qıtay – Oraylıq Aziya” birge islesiw forumı sheńberinde xalıqaralıq ekspertler, joqarı bilimlendiriw mákemeleriniń delegaciyaları hám ilimiy toparlardıń wákilleri menen bir qatar ushırasıwlar ótkerdi. Ushırasıwlarda birgeliktegi ilimiy baslamalardı keńeytiw, awıl xojalıǵı innovaciyaları, veterinariya baǵdarında ilimiy almasıw, laboratoriya ámeliyatlarınıń sapasın arttırıw hám akademiyalıq mobillik baǵdarlamaların rawajlandırıw máseleleri dodalandı.
Sonday-aq, Shinjon awıl xojalıǵı universiteti prezidenti menen de ushırasıw ótkerilip, eki joqarı oqıw ornı arasındaǵı birge islesiwdiń ámeliy tárepleri boyınsha pikir alısıwlar boldı.
– Urumchidegi sapar hám ushırasıwlar SamVMShBU Nókis filialı hám Shinjon awıl xojalıǵı universiteti arasında qol qoyılǵan birge islesiw memorandumına muwapıq ámelge asırıldı. Bul memorandum eki joqarı oqıw ornı arasındaǵı ilimiy baylanıslardı bekkemlew, birgeliktegi izertlewler, almasıwlar hám ámeliyat baǵdarlamaların jańa basqıshqa alıp shıǵıwdı názerde tutadı. Bul sapar etiw filialdıń xalıqaralıq maydandaǵı abırayın arttırdı, studentler hám ilimpazlar ushın jańa ilimiy hám ámeliy imkaniyatlar jarattı, sonday-aq, kelesi jıllarda birgeliktegi izlenisler, ilimiy joybar hám laboratoriyalıq ámeliyatlardıń nátiyjeliligin arttırıwǵa tiykar saldı, – deydi professor A.Esimbetov.
Memorandum tiykarındaǵı birge islesiw filialdıń ilimiy integraciyasın jańa basqıshqa alıp shıqtı, regionallıq hám xalıqaralıq birge islesiwde áhmiyetli perspektivalardı ashtı.

Qaraqalpaqstan xabar agentligi