Prezidentimiz Shavkat Mirziyoevtiń AQShqa ámelge asırǵan saparı sheńberinde AQSh Kongresi Wákiller palatasınıń aǵzaları menen ótkerilgen ushırasıwlar mámleketlerimiz arasındaǵı strategiyalıq sheriklik baylanısları izbe-iz hám maqsetli rawajlanıp atırǵanın tastıyıqladı.

Senattıń Qorǵanıw hám qáwipsizlik máseleleri komiteti Qutbiddin Burxonov bul haqqında óz pikirleri menen ortaqlastı:
– Kongresste Ózbekstan menen birge islesiw boyınsha kokus jumısınıń izbe-iz keńeyip atırǵanı atap ótildi. Hár jılı shólkemlestirilip atırǵan “Ózbekstan kúnleri” ánjumanı, nızam shıǵarıwshı uyımlar hám deputatlar arasındaǵı saparlar hám dodalawlar eki tárepleme qatnasıqlardı ámeliy mazmun menen bayıtıwǵa xızmet etpekte.
Ushırasıwlarda sawda-ekonomikalıq hám investiciyalıq birge islesiwdi tereńlestiriw, sanaat kooperaciyası, innovaciyalıq óndiris hám awıl xojalıǵı tarawlarında birgeliktegi joybarlardı ámelge asırıw boyınsha áhmiyetli usınıs hám baslamalar alǵa qoyıldı.
Atap aytqanda, Batıs Virdjiniya, Michigan hám Kaliforniya sıyaqlı shtatlar menen aymaqlararalıq baylanıslardı keńeytiw máselesiniń qoyılǵanı oǵada áhmiyetli. Bul baǵdardaǵı birge islesiw óndiris shınjırların baylanıstırıw, texnologiya hám tájiriybe almasıw, birgeliktegi kárxanalar shólkemlestiriw hám jańa jumıs orınların jaratıwǵa xızmet etedi.
Sonıń menen birge, mádeniy-gumanitarlıq birge islesiwdi keńeytiw hám bilimlendiriw jáne akademiyalıq almasıw baǵdarlamaların xoshametlew boyınsha da qosımsha imkaniyatlar bar. Bul jas áwladtı óz-ara túsinisiw hám doslıq ruwxında tárbiyalawda áhmiyetli faktor.
Ushırasıw juwmaǵında AQSh Kongresi delegaciyasınıń Ózbekstanǵa saparın ámelge asırıw, sonday-aq, eki mámleket aymaqları basshıları hám isbilermen toparları arasında turaqlı ushırasıwlar shólkemlestiriwge kelisip alınǵanı qatnasıqlardıń keleshektegi perspektivasın jáne de bekkemleydi.
Prezident Shavkat Mirziyoevtiń saparı eki tárepleme qatnasıqlardı jańa basqıshqa alıp shıǵıwda áhmiyetli qádem boldı. Biz parlament dárejesinde bul processti tolıq qollap-quwatlaymız hám birgelikte ámeliy nátiyjelerge erisemiz.

N.Abduraimova, WzA