Bajıxana komitetinde “Xalıqaralıq pochta hám kurerlik jóneltpeleri xalıqaralıq standartların engiziw” temasında seminar-trening bolıp ótti. Ilaj 4-7-noyabr kúnleri Germaniya xalıqaralıq birge islesiw jámiyeti (GIZ) “Oraylıq Aziyada sawda processlerin ápiwayılastırıw” regionallıq joybarı sheńberinde hám Ózbekstannıń Jáhán sawda shólkemine aǵza bolıwına járdemlesiw maqsetinde shólkemlestirildi.

Seminardıń ashılıwında Bajıxana komitetiniń juwapker basshıları, tiyisli basqarmalardıń qánigeleri, “Ózbekstan pochtası” AJ, Sanlı texnologiyalar ministrligi hám Perspektivalı joybarlar milliy agentliginiń wákilleri qatnastı.
Ilaj dawamında xalıqaralıq pochta hám kurerlik jóneltpeleri menen baylanıslı processlerdi jetilistiriw, bajıxana qadaǵalawı hám rásmiylestiriwdi sanlastırıw jáne elektron maǵlıwmatlar almasıwın ápiwayılastırıw máseleleri hár tárepleme dodalandı.
Seminar xalıqaralıq ekspert Ditmart Yorst tárepinen alıp barıldı.
Trening sheńberinde “Tashkent-AERO” qánigelestirilgen bajıxana kompleksindegi “Aviajúkler” hám “Elektron kommerciya” sırtqı ekonomikalıq baylanıs bajıxana postlarına ámeliy saparlar shólkemlestirildi. Xalıqaralıq ekspert orınlardaǵı jumıs, infrastruktura, málimleme almasıw sisteması, qadaǵalaw zonaları hám pochta jóneltpelerin qayta islew processlerin jaqınnan úyrendi.
Úyreniwler dawamında bajıxana processlerin jetilistiriw, júklerdi dizimnen ótkeriw hám tekseriw tártip-qaǵıydalarınıń nátiyjeliligin arttırıw boyınsha ámeliy usınıslar berildi.
Seminar juwmaǵında Ditmart Yorst Ózbekstan bajıxana sistemasında operativ jetkerip beriw sistemasın jetilistiriw, elektron kommerciya tarawındaǵı bajıxana tártip-qaǵıydaların ápiwayılastırıw hám Jáhán sawda shólkeminiń talaplarına muwapıqlastırıw boyınsha juwmaqlar hám usınıslar berdi.
Ekspert, sonday-aq, Ózbekstan bajıxana sistemasında ámelge asırılıp atırǵan sanlastırıw hám avtomatlastırıw baǵdarlarındaǵı jetiskenliklerdi joqarı bahaladı. Bul bolsa xalıqaralıq standartlarǵa muwapıq nátiyjeli sistemanı jaratıwda áhmiyetli qádem bolıp esaplanadı.

Sh.Mamaturopova, ÓzA