Sanitariyalıq tazalaw xızmetleriniń sapasın arttırıw hám tólem tártibin bekkemlew maqsetinde 2026-jıl 1-yanvardan baslap qattı turmıslıq shıǵındılardı jıynaw hám alıp shıǵıp ketiw xızmetleri ushın haqı tólewdiń jańa tártibi engizildi.
Usı tártipke bola, endi sanitariyalıq tazalaw tarawında tutınıwshılardan tek ǵana kórsetilgen xızmetler ushın tólem esaplanadı. Bul haqqında Shıǵındılardı basqarıw hám cirkulyar ekonomikanı rawajlandırıw agentligi málim etti.
Tutınıwshılar (fizikalıq hám yuridikalıq shaxslar) tárepinen qattı turmıslıq shıǵındılardı toplaw hám alıp shıǵıp ketiw boyınsha xızmetler ushın onlayn tólem sistemaları arqalı ámelge asırıladı.
Onlayn tólem sisteması tutınıwshılarǵa qálegen jerde hám waqıtta tólemdi ámelge asırıw, bankke barmastan waqıttı únemlew, esaptı ańsat qadaǵalaw hám cheklerdi onlayn júklep alıw imkaniyatın beredi. Sonday-aq, bul sistema xızmet kórsetiw procesinde ashıq-aydınlıqtı támiyinlep, nızamsız tólemler hám korrupciyalıq jaǵdaylardıń aldın alıwǵa xızmet etedi.
Qattı turmıslıq shıǵındılardı jıynaw hám alıp shıǵıp ketiw boyınsha xızmetler ushın tólemlerden túsken qarjılar tikkeley Shıǵındılardı basqarıw hám cirkulyar ekonomikanı rawajlandırıw agentliginiń arnawlı esap betine jiberiledi.
Toplanǵan qarjılar sanitariyalıq tazalaw kárxanaları, shıǵındı poligonları, shıǵındılardı jaǵıw zavodları hám ekosanaat zonalarında jumıs alıp barıp atırǵan isbilermenlik subektlerine esapqa alıwdıń birden-bir sisteması arqalı tólenedi. Tólemler shıǵındılardı tapsırıw, qabıl etiw, utilizaciyalaw yamasa qayta islew kóleminen kelip shıǵıp, belgilengen tártipte ámelge asırıladı. Nátiyjede qarjılardıń maqsetli jumsalıwı, sistemada finanslıq tártip hám qadaǵalawdıń kúsheytiliwi támiyinlenedi.
Sonday-aq, hár ay juwmaǵı menen xızmet kórsetiwshi sanitariyalıq tazalaw kárxanaları jumısınıń tiykarǵı nátiyjelilik kórsetkishleri bahalanıp barıladı.
Bahalaw nátiyjesinde sanitariyalıq tazalaw kárxanaları “qızıl,” “sarı” hám “jasıl” kategoriyalarǵa ajıratıladı. Bul kategoriyalar sanitariyalıq tazalaw kárxanaları ushın haqı tólewde esapqa alınadı. Yaǵnıy nátiyjelilik kórsetkishi joqarı bahalanǵan “jasıl” kategoriyadaǵı sanitariyalıq tazalaw kárxanalarına “qızıl,” “sarı” kategoriyadaǵılarǵa salıstırǵanda kóbirek haqı tólenedi. Bul tártip sanitariyalıq tazalaw kárxanalarınıń KPI kórsetkishleri tiykarında anıqlanadı.
Bul tártip sanitariyalıq tazalaw tarawında kórsetilgen xızmetke jarasa haqı tóleniwin, xızmetlerdiń sapasın arttırıwdı, xalıqtıń razılıǵına erisiwdi hám de cirkulyar ekonomikanıń rawajlanıwın támiyinlewge xızmet etedi.

ÓzA