OncoDaily xalıqaralıq platforması rak keselligine qarsı gúresiw boyınsha dúnya kún tártibin belgileytuǵın jetekshilerdi óz ishine alǵan “Onkologiya tarawındaǵı eń abıraylı 100 hayal” reytingin járiyaladı.

Olardıń arasında Ózbekstannıń Birinshi xanımı, “Zamin” xalıqaralıq jámiyetlik fondı Qáwenderlik keńesiniń baslıǵı Ziroat Mirziyoeva da bar.
Ekspertler Ziroat Mirziyoevanıń balalarda onkologiyalıq keselliklerdi erte anıqlaw hám emlew baslamaların alǵa qoyıw, balalar onkologiyası tarawında xalıqaralıq birge islesiwdi bekkemlew, sonday-aq, awır keselliklerge shatılǵan balalardıń ómir súriw dárejesin arttırıw boyınsha globallıq háreketti qollap-quwatlawdaǵı úlesin atap ótti.
“Ziroat Mirziyoeva 2025-jıl sentyabr ayında BMSh Bas Assambleyasında Jáhán densawlıqtı saqlaw shólkemi hám St.Jude izertlew emlewxanası menen birgelikte shólkemlestirilgen “Rak hám basqa da ómir ushın qáwipli keselliklerge shalınǵan balalardıń ómir súriw dárejesin arttırıw hám azap-aqıbetlerin azaytıw boyınsha globallıq háreket” atamasındaǵı áhmiyetli forumǵa basshılıq etti hám dúnya jámiyetshiligin rak keselligine shalınǵan balalardıń ómir súriw dárejesin arttırıw ushın qıstawlı ilajlar kóriwge shaqırdı.
Onıń jumısında pútkil dúnya boylap, ásirese, ómir súriw kórsetkishleri sezilerli dárejede tómen bolǵan mámleketlerde balalarǵa medicinalıq járdemnen teń paydalanıwdı támiyinlew máseleleri ayrıqsha orın iyeleydi. Ol milliy strategiyalardı 2030-jılǵa barıp rak keselligine shalınǵan balalardıń ómir súriw dárejesin 60 procentke jetkeriw sıyaqlı xalıqaralıq maqsetler menen baylanıstırıw arqalı Ózbekstannıń globallıq densawlıqtı saqlaw siyasatındaǵı ornın bekkemledi,” delinedi reytingte.
Ziroat Mirziyoevanıń xalıqaralıq reytinge kirgiziliwi onıń juqpalı bolmaǵan keselliklerge qarsı gúresiwdi milliy hám globallıq dárejede kúsheytiwge qosqan jeke úlesiniń tán alınıwı, sonıń menen birge, Jańa Ózbekstanda densawlıqtı saqlaw tarawında ámelge asırılıp atırǵan keń kólemli reformalardıń nátiyjeliliginiń tastıyıǵı bolıp esaplanadı, – dep málimleme beredi xabar.uz saytı.

Qaraqalpaqstan xabar agentligi