Prezident Shavkat Mirziyoevtiń medicina hám farmacevtika xızmetkerleri menen ushırasıwı dawam etpekte.

– Búgin adamlardıń turmısqa kózqarası da, talap hám mútájlikleri, kózqarası da túp-tiykarınan ózgerdi. Bul basqa tarawlar qatarında medicinada da sapanı arttırıw, zamanagóy kózqaraslardı alıp kiriw boyınsha aldımızǵa jańa wazıypalardı qoymaqta.
Sonıń ushın, noyabr-dekabr ayında qattı tayarlıq kórip, yanvardan medicinada xalıqtıń bahasın esitetuǵın sistemanı engizemiz, – dedi mámleketimiz basshısı.
Endi 26 oraydıń direktorları, wálayatlıq, rayonlıq densawlıqtı saqlaw basshıları, shańaraqlıq poliklinika baslıqları bir aylıq anıq reje tiykarında islewge ótedi.
Bul basshılar televidenie hám sociallıq tarmaqlarda shıǵıp, ózine alǵan wazıypalardı, qaysı kesellikler kóp ushırasıp atırǵanı hám olardı azaytıwdı xalıqqa járiyalap baradı. Sonday-aq, adamlarǵa múrájat etip, densawlıǵına itibar beriw, medicinalıq tekseriwden óz waqtında ótiw, durıs awqatlanıw hám fizikalıq belsendilikti túsindiredi.
Oray basshıları óz tarawında eń awır rayon hám máhállege baradı. Bir ay qalıp, keselliklerdiń sebeplerin úyrenip, olarǵa sheshim beredi, shańaraqlıq poliklinika hám rayonlıq emlewxanalardıń shıpakerlerin kesellikti emlewge úyretedi.

ÓzA