Prezident Shavkat Mirziyoevtiń medicina hám farmacevtika xızmetkerleri menen ushırasıwı dawam etpekte.

Prezidentimiz bul májilis xalqımız ushın da, medicina tarawı hám onıń wákilleri ushın da paydalı bolıwı kerek ekenligin kórsetip ótti. Sonlıqtan, sheshimin kútip turǵan máselelerdi ashıq-aydın sóylesip alıwdı usınıs etti.
Inflyaciyanı jılawlaw, azıq-awqat ónimleriniń bahasın turaqlı uslap turıw boyınsha kóp jumıslar islenbekte. Biraq xalıq dáramatınıń úlken bólegin tiykarınan dári-dármaqqa jumsap atırǵanı atap ótildi.
– Qánigelesken oraylarǵa sońǵı bes jılda 7,5 trillion sum qarjı berildi. Olar mıńlaǵan eń zamanagóy úskeneler menen támiyinlendi. Dári jetispey atır dep birde-bir oray ayta ala ma?
Mine, usı qarjılar, úskeneler hám dári-dármaqlar qalay jumsalmaqta? Tilekke qarsı, úskenelerdiń quwatlılıǵınan tek ǵana 25 procent paydalanılıp atır, – dedi Prezident.
Sanlastırıw, sırt elden sherikler tabıw, klinikalıq protokollardı jańalaw, aldınǵı diagnostika, profilaktika hám emlewdi epleytuǵın zamanagóy jámiyetshilikti qáliplestiriw boyınsha islemegen oray, rayonlıq, wálayatlıq densawlıqtı saqlaw basqarmaları hám bólimleriniń keleshegi joq ekenligi atap ótildi.
Qaysı máhállede, rayonda qanday kesellik kóbeygen yamasa azayǵanın tallap, olardıń aldın alıw hám nátiyjeli emlew boyınsha anıq reje menen islesiw, respublikalıq oraylar bunday tallaw hám qatnas penen jumıstı tómende shólkemlestiriwi, úlken qarjı esabınan alıp berilgen eń zamanagóy úskenelerden nátiyjeli paydalanıw hár qashanǵıdan da áhmiyetli ekeni kórsetip ótildi.

ÓzA