Ózbekstan Respublikası Prezidentiniń qararı

Mámleketlik medicina mákemeleri xızmetkerlerin sociallıq qorǵawdı kúsheytiw, olardıń materiallıq mápdarlıǵın arttırıw, nátiyjeli jumıs islewi ushın múnásip sharayatlar jaratıw maqsetinde qarar etemen:
I. Maqsetler
1. Tómendegiler medicina hám farmacevtika xızmetkerlerin qollap-quwatlawdıń tiykarǵı maqsetleri etip belgilensin:
a) medicina hám farmacevtika xızmetkerlerin sociallıq qorǵawdı kúsheytiw, olardıń materiallıq mápdarlıǵın arttırıw;
b) xalıqqa sapalı hám nátiyjeli medicinalıq xızmet kórsetip atırǵan pidayı xızmetkerlerge qosımsha xoshametlew ilajların engiziw;
v) perspektivalı jas qánigelerdiń óz kásiplik mamanlıǵın arttırıp barıwı ushın qosımsha imkaniyatlar jaratıw;
g) “shıpaker – xalıqtıń salamatlıǵı saqshısı” súreni astında jámiyette olardıń abırayın arttırıw.
II. Medicina hám farmacevtika xızmetkerlerin finanslıq qollap-quwatlaw
2. 2026-jıldan baslap mámleketlik medicina mákemeleriniń xızmetkerleri Medicina xızmetkerleri kúni múnásibeti menen Medicina mákemelerin materiallıq xoshametlew hám rawajlandırıw qorı esabınan hár jılı miynetke haqı tólewdiń eń az muǵdarında xoshametlensin.
3. Medicina xızmetkerleri kúni múnásibeti menen hár jılı tómendegi nominaciyalar boyınsha tańlaw ótkerilsin:
a) “Eń jaqsı respublikalıq emlewxana baslıǵı,” “Eń jaqsı aymaqlıq densawlıqtı saqlaw uyımınıń baslıǵı”;
b) hár bir aymaqta:
i) “Eń jaqsı rayon (qala) densawlıqtı saqlaw uyımı baslıǵı,” “Eń jaqsı shańaraqlıq poliklinika baslıǵı,” “Eń jaqsı rayon (qala) shıpakeri” hám “Eń jaqsı rayon (qala) orta medicina xızmetkeri”;
ii) “Eń jaqsı shańaraqlıq poliklinika,” “Eń jaqsı rayon (qala) lıq emlewxana” hám “Eń jaqsı aymaqlıq emlewxana.”
4. Tómendegiler:
a) tańlaw nátiyjeleri tiykarında jeńimpazlar tómendegi muǵdarlarda Medicinanı rawajlandırıw mámleketlik maqsetli qorı (keyingi orınlarda – Qor) esabınan bir mártelik xoshametlenetuǵını:
i) medicina mákemeleri – 500 million sum;
ii) medicina hám basshı xızmetkerler – 30 million sum;
b) tańlaw jeńimpazları Medicina xızmetkerleri kúni aldınan járiyalanadı, olardı mámleketlik sıylıqlarǵa usınıs etiw jáne sırt eldegi abıraylı bilimlendiriw hám ilimiy shólkemlerde Qordıń qarjıları esabınan menedjerlik hám basqa da zamanagóy baǵdarlamalar tiykarında oqıtıw ámeliyatı jolǵa qoyılatuǵını;
v) “Eń jaqsı respublikalıq emlewxana baslıǵı,” “Eń jaqsı rayon (qala) densawlıqtı saqlaw uyımı baslıǵı” hám “Eń jaqsı shańaraqlıq poliklinika baslıǵı” nominaciyaları boyınsha tańlaw jeńimpazları “Ózbekstan Respublikasında xızmet kórsetken densawlıqtı saqlaw xızmetkeri” húrmetli ataǵı menen sıylıqlawǵa usınıs etiletuǵını belgilensin.

5. 2026-jıl 1-aprelden baslap mámleketlik medicina mákemeleriniń jumıs waqtı rejimi bes kúnlik jumıs háptesine ótkerilsin. Onda medicina mákemeleri jumısınıń úzliksizligin támiyinlew ushın bayram hám dem alıs kúnleri náwbetshilik tiykarında islew jolǵa qoyıladı.
6. 2026-jıl 1-yanvardan baslap mámleketlik medicina mákemelerinde Qor qarjıları esabınan:
a) rayon (qala) dárejesinde jańa emlew usılların engizgen hám onıń unamlı nátiyjesine erisken rayon (qala) medicina mákemeleriniń shıpakerlerine bazalıq esaplaw muǵdarınıń 50 esesi muǵdarında bir mártelik aqshalay sıylıq beriledi;
b) mámleketlik medicina mákemelerinde keminde 15 jıl jumıs stajına iye bolǵan medicina hám farmacevtika xızmetkerleriniń perzentlerine respublika aymaǵındaǵı joqarı bilimlendiriw shólkemlerinde bakalavriat tálim baǵdarı boyınsha jıllıq kontrakt summasınıń 30 procenti muǵdarındaǵı, biraq bazalıq esaplaw muǵdarınıń 15 esesinen aspaǵan bólegi qaplap beriledi;
v) medicina hám farmacevtika xızmetkerleriniń xalıqaralıq ilimiy-texnikalıq maǵlıwmatlar bazasında indekslenetuǵın hám joqarı impakt-faktorlı jurnallarda maqalalardı basıp shıǵarıwǵa baylanıslı qárejetleri tolıq qaplap beriledi;
g) hár jılı mámleketlik medicina mákemelerinde keminde 15 jıl miynet stajına iye bolǵan 500 medicina hám farmacevtika xızmetkerlerin turaq jay menen támiyinlew ushın ipoteka krediti tiykarında satıp alınatuǵın turaq jaydıń dáslepki tóleminiń 25 procenti qaplap beriledi.
Densawlıqtı saqlaw ministrligi jáne Ekonomika hám qarjı ministrliginiń milliy akkreditaciyadan ótken mámleketlik medicina mákemeleriniń xızmetkerlerine 2026-jıl 1-yanvardan baslap lawazımlıq miynet haqısınıń 10 procenti muǵdarında aylıq ústeme tólew haqqındaǵı usınısına kelisim berilsin.
8. 2026-jıl 1-yanvardan baslap mámleketlik medicina mákemeleriniń medicina hám farmacevtika xızmetkerlerine tómendegi qosımsha jeńillikler berilsin:
a) mámleketlik medicina mákemelerinde keminde 3 jıl jumıs stajına iye bolǵan xızmetkerlerge Mámleketlik byudjet qarjıları esabınan bir jılda bir márte biypul joqarı texnologiyalı qánigelestirilgen medicinalıq járdem kórsetiw;
b) mámleketlik medicina mákemelerinde keminde 15 jıl jumıs stajına iye bolǵan xızmetkerlerge Kásiplik awqamları federaciyası hám medicina mákemesiniń qarjıları esabınan bir jılda bir márte respublika aymaǵındaǵı sanatoriylerge biypul jollama beriw;
v) barlıq túrdegi mámleketlik xızmetler ushın tólemlerdiń muǵdarın eki esege azaytıw.
III. Qarardıń orınlanıwın shólkemlestiriw, támiyinlew hám qadaǵalaw
9. Densawlıqtı saqlaw ministrligi bir ay múddette usı qararda belgilengen jeńilliklerdi qollanıw jáne tańlaw jeńimpazların anıqlaw boyınsha normalar menen tártip-qaǵıydalardı tastıyıqlaw ilajların kórsin.
10. Ekonomika hám qarjı ministrligi 2026-jıldan baslap:
a) usı maqsetler ushın hár jılı Qorǵa qosımsha indekslenip barılatuǵın 100 milliard sum qarjı ajıratsın;
b) Mámleketlik byudjet parametrlerinde usı qarar menen belgilengen ilajlardı ámelge asırıwǵa baylanıslı qárejetlerdi qarjılandırıw ushın zárúr qarjılardıń názerde tutılıwın támiyinlesin.
11. Densawlıqtı saqlaw ministrligi mápdar ministrlikler hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
12. Usı qarardıń orınlanıwın nátiyjeli shólkemlestiriwge juwapker hám jeke juwapker etip densawlıqtı saqlaw ministri A.A.Xudayarov belgilensin.
13. Qarardıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyası basshısınıń medicinanı reformalaw boyınsha orınbasarı T.A.Alievaǵa júklensin.

Ózbekstan Respublikası
Prezident Sh.MIRZIYoEV
Tashkent qalası,
2025 – jıl 9 – noyabr