Mámleketimiz regionallıq hám xalıqaralıq dárejede hayal-qızlar jetekshiligi tarawında tájiriybe orayına aylanıp barmaqta. Xalıqaralıq maydanda Ózbekstannıń bul baǵdardaǵı háreketleri joqarı bahalanbaqta.

Atap aytqanda, Jáhán bankiniń bahalawına bola, hayal-qızlardıń huqıqları menen imkaniyatların keńeytiw boyınsha eń úlken jetiskenliklerge erisken bes mámleket qatarında Ózbekstan da bar.
Tashkent qalasında “Mámleketlik basqarıwda hayal-qızlardıń roli: Ózbekstan keleshegin qáliplestirip atırǵan reformalar hawazı” atamasında ótkerilgen xalıqaralıq konferenciyada bul haqqında sóz etildi.
Basqarıw nátiyjeliligi agentliginiń baslaması menen shólkemlestirilgen ilajda Senat aǵzaları, Nızamshılıq palatasınıń deputatları, Hayal-qızlardıń jámiyettegi rolin arttırıw, gender teńlik hám shańaraq máseleleri boyınsha respublikalıq komissiya hám xalıqaralıq shólkemlerdiń wákilleri jáne belsendi basshı hayal-qızlar qatnastı.
Ilajda Senat Baslıǵı Tanzila Norboeva hayal-qızlardıń siyasiy, sociallıq hám ekonomikalıq processlerdegi belsendiligin arttırıw mámleketimizdiń tiykarǵı baǵdarlarınan biri ekenin atap ótti.
Mámleketimizdiń parlament sistemasında hayal-qızlardıń qatnasıwı izbe-iz artıp baratırǵanı atap ótildi. Sonıń ishinde, Nızamshılıq palatası deputatlarınıń 38 procenti, Senat aǵzalarınıń 27 procenti, sonday-aq, jergilikli keńesler deputatlarınıń 32 procentten aslamın hayal-qızlar quraydı.
4 jıl dawamında jumıs alıp barıp atırǵan “Basshı hayal-qızlar mektebi” arqalı 400 den aslam hayal-qızlar zamanagóy basqarıw hám jetekshilik kónlikpelerin iyeledi. Búgingi kúnde rezervke kirgizilgen hayal kadrlar óz potencialı, intakerligi hám pidayılıǵı menen ajıralıp turıptı.
Sonıń menen birge, mámleketimizde gender teńlikti támiyinlew boyınsha keń kólemli jumıslar ámelge asırılmaqta. Keyingi segiz jılda hayal-qızlardıń huqıqların qorǵawǵa qaratılǵan 110 nan aslam normativlik-huqıqıy hújjet qabıl etildi. Qabıl etilip atırǵan nızam joybarlarınıń gender ekspertizasınan ótkeriliwi, gender audit hám byudjetlestiriw sistemalarınıń engiziliwi tarawda kompleksli qatnastı támiyinlemekte.
Hayal-qızlar isbilermenligin qollap-quwatlaw boyınsha kórilgen ilajlar nátiyjesinde keyingi jıllarda isbilermen hayal-qızlardıń sanı 3,7 esege arttı.
Ilajda atap ótilgenindey, hayal-qızlardıń mámleketlik basqarıwdaǵı qatnasın jáne de keńeytiw, basshılıq lawazımlarına tayarlaw sistemasın kúsheytiw, orınlarda da hayal-qızlardıń jetekshiligin qollap-quwatlaw áhmiyetli wazıypa bolıp qalmaqta.
Hayal-qızlardı qarar qabıl etiw processlerine jedel tartıw, olardıń kásiplik sheberligin arttırıw, ekonomikalıq erkinligin bekkemlew, sanlı ekonomika hám ilimdegi qatnasın keńeytiwge qaratılǵan jumıslardı izbe-iz dawam ettiriw zárúrligine itibar qaratıldı.

N.Abduraimova, ÓzA