Diyqanshılıqta beruniylilerdiń ózleri jaratqan tájiriybe mektebi bar. Ásirese, jerdiń sırın jaqsı iyelegen diyqanlardıń miynet nátiyjesi gúz máwsimi keliwi menen bilinedi. Beruniy rayonı «Nawayı» awıl puqaralar jıyını mısalında diyqanlardıń erisken jetiskenlikleri hám gúzgi zúráát jıyını menen tanıstıq. Nawayı awılında xalıqtıń sanı 7 mıń 753 ti quraydı. Aymaqtıń tiykarǵı drayver tarawları diyqanshılıq, sharwashılıq, sawda xızmet kórsetiw bolıp, bul baǵdarda bir qansha jańa tájiriybeler jolǵa qoyılmaqta.

Máhálle hákimi járdemshisiniń maǵlıwmatına bola, aymaqta ǵálleniń ornına egilgen ovoщ-palız ónimleriniń zúrááti bıyılǵı jılı biraz joqarı boldı. Atap aytqanda, “Izzat Jumaniyazov” fermer xojalıǵı tárepinen 3 gektar jerge egilgen geshir, túrpi, shalǵam hám kapusta sıyaqlı ovoщ ónimleriniń zúráátin jıynap-terip alıw baslanǵan. Ásirese, bul aymaqta geshir zúrááti jaqsı: 3 gektar jerden 90-100 tonna geshir alınadı. Fermer xojalıǵı menen ijara shártnaması tiykarında 10 sotıxtan 1 gektarǵa shekemgi jerlerde de ónim jıynaw jumısları baslanǵan. Xalıqtıń tiykarǵı dáramat deregi diyqanshılıq esaplanadı. Jıynap-terip alınǵan ónim muzlatqıshlarda saqlanadı.
Óz úyinde násilli sharwa baǵıp, onı kóbeytiw menen shuǵıllanıp atırǵan Sapargúl Jamalovanıń shańaraǵında semintal hám goldshteyn násilli qaramallar saqlanadı. Kúnine 30-40 litr sút sawılıp, dúkanlarǵa tapsırıladı. Sharwa mallarınıń qıs máwsimi ushın azıq-awqatı ǵamlanıp, sharayatları jaratıladı. Násilli sharwanı kóbeytip, onı satıp dáramatın iygilikli islerge jumsap atırǵan shańaraq iyeleriniń keleshektegi rejeleri úlken. Zamanagóy fermer xojalıǵın shólkemlestirip, elimizdiń sharwashılıq baǵdarına múnásip úles qosıwdı maqset etken. Aymaqlarda xalıqtıń búgingi kúndegi reformalar menen únles jasap atırǵanı, bul jolda birlesip háreket etip atırǵanı bárshemizdi quwandıradı.

Qaraqalpaqstan xabar agentligi.