Ózbekstan hám Qıtay birge islesiwinde ekologiyalıq ortalıqtı qorǵawǵa qaratılǵan jáne bir áhmiyetli joybar ámelge asırılmaqta. Qıtaydıń “Qingyan Environmental Technology” kompaniyası tárepinen kúnine 40 mıń kub metr shıǵındı suwdı tazalaw quwatlılıǵına iye zamanagóy imarat qurılmaqta.

Bul kompleks tek ǵana suwdı tazalaw emes, al hawanı tazalaw sistemaları menen de úskenelenedi. Onda tórt texnologiyalıq shınjır izbe-izlikte isleydi hám bul sistema iri sanaat zonaları jáne boyawxanalardan shıǵatuǵın suwdı nátiyjeli tazalaw imkaniyatın beredi.
Joybar Evropa ekologiyalıq standartlarına tolıq sáykes bolıp, shıǵındı suwdıń 60 procenti qayta islenedi. Sistemada payda bolatuǵın shlam (ılay) arnawlı keptirilip, elektr energiyasın islep shıǵarıwda qayta paydalanıladı. Bul bolsa qorshaǵan ortalıqqa unamsız tásirdi keskin azaytadı.
Joybar mámleketlik-jeke menshik sheriklik tiykarında ámelge asırılmaqta. Qıtaylı birge islesiwshiler imarattı 15 jıl dawamında basqarıp, suwdı tazalaw, ximiyalıq qayta islew hám xızmet kórsetiw processlerin tolıq óz moynına aladı. Bir kub metr suwdı tazalaw qárejeti 1-1,2 AQSh dolları átirapında bolıwı kútilmekte.
Qurılıs jumısları 8 ay ishinde juwmaqlanadı. Imarat paydalanıwǵa tapsırılǵannan soń, jergilikli toqımashılıq kárxanaları ekologiyalıq taza suwdan paydalanǵan halda ónimlerin xalıqaralıq standartlarǵa sáykes túrde islep shıǵarıw imkaniyatına iye boladı.

Hamroz Bayanov,
ÓzAnıń xabarshısı