Ózbekstan Prezidentiniń Vashingtonǵa saparı sheńberinde mámleketimiz basshısı menen sóylesiwde bolǵan AQSh Kongresi Wákiller palatasınıń aǵzası Sidni Kamlager-Dav ǴXQ wákilleriniń qısqa sorawlarına juwap berdi:

– Bul ushırasıw Ózbekstan Prezidenti menen birinshi sóylesiwińiz be?
Awa, men Ózbekstan jetekshisi menen ájayıp ushırasıw ótkerdim, dep ayta alaman. Prezident Shavkat Mirziyoev sóylesiw waqtında óziniń turmıslıq tájiriybesi hám mámlekettiń keleshegi baǵdarındaǵı kózqarasları menen ortaqlastı. Men onıń joqarı hám mektepke shekemgi bilimlendiriw tarawında erisken jetiskenlikleri, mámlekette hayal-qızlardı basshılıq lawazımlarına tartıw jolındaǵı jumıslarınan ilhamlandım. Sonday-aq, hár eki tárep ushın payda keltiretuǵın qatnasıqlardıń áhmiyeti haqqında sóylestik. Men Prezidentti futbol boyınsha Ózbekstan milliy saylandı komandası jáhán chempionatına jollama alǵanı menen de qutlıqladım. Jáhán chempionatı waqtında óz okrugimde elińizden keletuǵın barlıq miymanlardı kútip alıwdı hám olardı 2028-jılǵı Olimpiada oyınlarında jáne qabıllawdı intizarlıq penen kútemen.
– Mámleketimiz basshısınıń Vashingtonǵa saparı haqqında qanday pikirdesiz?
– Meniń pikirimshe, Prezidenttiń S5+1 sammiti ushın AQShqa saparı Ózbekstan Oraylıq Aziyada qanshelli áhmiyetli orın iyeleytuǵının kórsetedi. Ushırasıwlarda qatnasqanımızdan quwanıshlımız. S5+1 sammiti Kongress aǵzaları ushın oǵada áhmiyetli ekenin hámme ańlap jetedi, dep úmit etemen.
– Sońǵı jılları elimizde ámelge asırılıp atırǵan ekonomikalıq hám siyasiy reformalardı qalay bahalaysız?
– Sóylesiw dawamında biz Oraylıq Aziya mámleketleri, sonıń ishinde, Ózbekstanǵa da baylanıslı ámeldegi Jekson-Venik dúzetiwin biykarlaw haqqında, sonday-aq, shegara qáwipsizligi hám ekonomikanıń gúllep-jaynawı haqqında sóylestik.
Usı jerde Ózbekstan AQSh puqaraları ushın 30 kúnlik vizasız rejim engizgenin qollap-quwatlayman. Menińshe, bul eki mámleket arasında mádeniyat hám bilimlendiriw almasıwın rawajlandırıwdıń ájayıp usılı. Shavkat Mirziyoev júdá uzaqtı kóre alatuǵın Prezident.
– Keyingi waqıtta Oraylıq Aziyada kóplegen unamlı ózgerisler júz berdi. Region mámleketleri bir-birine jaqınlastı, qatnasıqlar jáne de doslıqqa aylandı. Bul jańalıqlarda Ózbekstan, atap aytqanda, jetekshi Shavkat Mirziyoevtiń ornı qanday, sizińshe?
– Men Kongresste Qubla hám Oraylıq Aziya boyınsha tómengi komitet aǵzasıman. Sol sebepli AQSh hám Ózbekstan qatnasıqların rawajlandırıwǵa járdemlesiw men ushın oǵada áhmiyetli. Ózbekstan pútkil regionda sheshiwshi orın iyelegenin tán alaman. Solay eken, turaqlılıq, ekonomikalıq abadanlıq, tınıshlıq – bul máselelerdiń barlıǵı Ózbekstan pútkil region boylap qatnasıqlardı basqarıwı hám region kóleminde sonday qúdiretli kúsh sıpatında kórine alıw qábiletine baylanıslı, dep oylayman.

Ótkir Alimov tayarladı.
ÓzA