Ózbekstan Respublikası Prezidenti “Xalıqtı azıq-awqat ónimleri menen turaqlı támiyinlewge baylanıslı qosımsha ilajlar haqqında” qarar qabıl etti.

Oǵan muwapıq, Respublika xalqın tiykarǵı túrdegi azıq-awqat ónimleri, atap aytqanda, gósh, sút, máyek, balıq, ósimlik mayı hám kartoshka menen kepillikli támiyinlew, sharwashılıq xojalıqlarınıń azıq-awqat bazasın túpkilikli jaqsılaw, olardıń jumısın keńeytiw ushın qosımsha sharayatlar jaratıw hám bahalardıń turaqlılıǵın saqlaw maqsetinde:
a) jer hám suw resurslarınan aqılǵa uǵras paydalanıw arqalı azıq-awqat ónimlerin jetistiriwdi kóbeytiw esabınan xalıqtı azıq-awqat ónimleri menen turaqlı támiyinlew;
b) respublika xalqı mútájligi ushın sociallıq áhmiyetli túrdegi azıq-awqat ónimlerin kepillikli jetkerip beriw hámde tolıq shınjırda maylı, ot-jem, kartoshka hám basqa da eginlerdi jetistiriw ushın finanslıq imkaniyatlardı keńeytiw;
v) azıq-awqat ónimlerin islep shıǵarıwshı, maylı hám ot-jem ónimlerin qayta islewshi, násilli sharwa hám qus jetistiriwshi jáne veterinariya xızmetin kórsetiwshi isbilermenlik subektlerin qollap-quwatlaw ushın qolaylı sharayat jaratıw;
g) kelesi 3 jılda iri qaramallar sanın qosımsha 445 mıń basqa, qoy hám eshkiler sanın 1,7 mln basqa, quslar sanın 10,3 mln basqa, balıq jetistiriw kólemin 200 mıń tonnaǵa, ósimlik mayı islep shıǵarıwdı 30 mıń tonnaǵa arttırıw názerde tutılǵan.
Azıq-awqat ónimlerin jetistiriw hám qayta islew kólemin arttırıw, násilli sharwa hám qus jetistiretuǵın jáne veterinariya xızmetin kórsetetuǵın isbilermenlik subektleri ushın Awıl xojalıǵın mámleket tárepinen qollap-quwatlaw qorınıń qarjıları esabınan kommerciyalıq bankler tárepinen azıqlıq hám maylı eginlerdi jetistiriw qárejetlerin qarjılandırıw ushın ónim bahasınıń 50 procentine shekem 12 procentlik stavkada (sonnan 4 procentlik marja) 12 ay múddetke jeńilletilgen kreditler ajıratıladı.
2025-jıl 1-noyabrden 2030-jıl 31-dekabrge shekem “Isbilermenlikti rawajlandırıw kompaniyası” akcionerlik jámiyeti tárepinen Kredit procent qárejetlerin kompensaciyalaw qorı esabınan usı qararda keltirilgen baǵdarlar hám shártler boyınsha isbilermenlik subektlerine Oraylıq banktiń tiykarǵı stavkasınıń eki esesinen aspaǵan muǵdarda milliy valyutada ajıratılatuǵın kreditlerdiń tiykarǵı stavkadan 4 procent punktten joqarı, biraq 10 procent punktke shekemgi bólegi, sırt el valyutasında ajıratılatuǵın kreditlerdiń 8 procentten joqarı, biraq 4 procentten punktke shekemgi bólegi qaplap beriledi jáne milliy hám sırt el valyutasındaǵı kreditleriniń 50 procentke shekemgi, biraq 10 milliard sum ekvivalentinen aspaǵan bólegine kepillik usınıs etiledi.
Iri hám mayda shaqlı qaramallardı baǵıwǵa qánigelesken máhállelerge násillikti jaqsılaw ushın sırt el hám jergilikli veterinar hám basqa da qánigelerdi Awıl xojalıǵı ministrligi yamasa Veterinariya hám sharwashılıqtı rawajlandırıw komiteti tárepinen tartıw, bunda qárejetlerdiń 50 procent bólegi olardıń juwmaǵına tiykarlanıp tiyisliligi boyınsha Diyqan xojalıqları hám qıytaq jer iyeleri jumısın qollap-quwatlaw qorınıń qarjıları esabınan qaplap beriledi.
2026-jıl 1-yanvardan baslap azıqlıq hám maylı eginlerdi jetistiriwshi subektlerge ónim jetistiriwde suwǵarıw ilajları ushın óz balansındaǵı nasos agregatları jumsaytuǵın elektr energiyası qárejetleriniń 50 procent bólegi Mámleketlik byudjetten qaplap beriledi.
Qararǵa muwapıq, dáslepki basqıshta iri hám mayda qaramal baǵıwǵa qánigelesken 200 máhálleniń dizimi qáliplestiriledi hám 2026-jıl 1-yanvardan sırt elli hám jergilikli veterinarlar tartıladı.
Sharwashılıq xojalıqlarına sırt mámleketlerden import etilgen násilli qaramal, qoy hám eshkiler ushın subsidiya ajıratıw tártibiniń ámel etiw múddeti 2030-jıl 31-dekabrge shekem sozdırıladı.
Násilli bir kúnlik shójeler importı ushın belgilengen subsidiyalar 2026-jıl 1-yanvardan baslap 2030-jıl 31-dekabrge shekem tek ǵana jergilikli islep shıǵarıwshılardan gósh baǵdarında usı násilli bir kúnlik shójeler satıp alınǵanda ajıratıladı.
2026-jıl 1-yanvardan 2027-jıldıń aqırına shekem tiri iri shaqlı qaramal (TIF TN boyınsha kodı 0102) hám tiri qoy hám eshkilerdi (TIF TN boyınsha kodı 0104) import etiwde;
esaplanǵan qosımsha qun salıǵın 180 kúnge keshiktirip tólewge ruqsat beriledi;
tólengen qosımsha qun salıǵınıń ornın qaplaw (qaytarıp beriw) nızamshılıqta belgilengen tártipte ámelge asırıladı.
2026-jıl 1-yanvardan baslap mámleketlik veterinariya xızmeti qadaǵalawı astındaǵı tovarlardı Ózbekstan Respublikası aymaǵına alıp kiriwde veterinariya ruqsatnaması hám sertifikatı qáwipti tallaw nátiyjelerine bola beriledi hám veterinariya ruqsatnaması hám sertifikatı 2 ese qısqarǵan múddette kórip shıǵıladı. Azıqlıq ónimlerin jetistiriw ushın 49 jılǵa ijaraǵa berilgen jerler jáne ulıwma paxta-ǵálleshilik hám sharwashılıq xojalıqlarınıń 10 gektardan kem bolmaǵan jerleriniń 1 procent, biraq 20 sotixtan kóp bolmaǵan bóleginde iri hám mayda shaqlı qaramallardı saqlaw ushın jeńil konstrukciyalı imarat, suw rezervuarı hám azıqlıq saqlaw qoymaxanaların qurıwǵa ruqsat beriledi.
2026-jıl 1-iyulge shekem jaylaw jerlerin tiklew boyınsha Aziya rawajlanıw bankiniń qatnasıwında ulıwma bahası 63 million AQSh dollarına teń joybar ámelge asırıladı.
Joybar sheńberinde jergilikli xalıqtıń úy sharayatında baǵılatuǵın sharwa malların azıqlandırıw ushın jámiyetlik jaylawlardı shólkemlestiriw, respublikada bar jaylaw jerlerin tolıq xatlawdan ótkeriw, jaylaw jerleriniń jaǵdayın hám infrastrukturasın tiklew, atap aytqanda, suwǵarıw qudıqların qazıw, ósimlik túrlerin keńeytiw, zamanagóy texnologiyalar (dronlar)dan paydalanǵan halda tuqım sebiw, jaylawlardan paydalanıw boyınsha zárúr ilajlar ámelge asırıladı.

ÓzA