Bizge belgili, kino kórkem óneri insan ómiri, sezimleri hám pikirlerin ekran arqalı kórsetiwdiń eń tásirsheń qurallarınan biri bolıp esaplanadı. Ol tek ǵana kewil ashar emes, al xalıqlar arasında mádeniy qarım-qatnas, pikir alısıw hám óz-ara túsinisiwdi tereńlestiretuǵın áhmiyetli dóretiwshilik maydan bolıp esaplanadı. Sonlıqtan, kino tek ǵana kórkem óner emes, al adamgershilik hám jámiyetlik qatnasıqlardı úyretiwshi tásirsheń faktor bolıp esaplanadı.

Búgin Tashkent qalasında baslanǵan X Evropa kinofestivalınıń tiykarǵı maqseti de áyne usı ideyaǵa qaratılǵan.
Usı múnásibet penen paytaxtımızda ǵalaba xabar qurallarınıń wákilleri ushın baspasóz ánjumanı shólkemlestirildi. Evropa Awqamınıń elimizdegi delegaciyası hám Ózbekstanda akkreditaciyadan ótken Evropa Awqamına aǵza mámleketlerdiń elshixanaları, sonday-aq, Kinematografiya agentliginiń járdeminde ótkerilgen bul ilajda tarawdıń juwapker wákilleri, qánigeler hám ǴXQ xızmetkerleri qatnastı.
Evropa Awqamınıń Ózbekstandaǵı elshisi Toyvo Klaar hám Kinematografiya agentliginiń direktorı Shuhrat Rizaev shıǵıp sóylep, kino kórkem óneri tarawındaǵı birge islesiw hám festivaldıń dástúriy ótkeriliwi mádeniy baylanıslardı bekkemlewde úlken áhmiyetke iye ekenin atap ótti.
Baǵdarlamaǵa 12 Evropa mámleketinen saylap alınǵan filmler kirgizilgen bolıp, olardıń arasında lirikalıq dramalar, insan ózligin ańlaw haqqındaǵı ilhamlandırıwshı turmıslıq gúrrińler jáne sezimler hám tańlawlar sáwlelengen shıǵarmalar bar. Sonday-aq, Ispaniyanıń belgili “Aire Nuevo Danza” toparı klassikalıq hám zamanagóy ayaq oyınlardan ibarat saxnalıq kórsetiwlerdi kórsetedi.
-Biz bıyıl onınshı márte Evropa kinofestivalına birgelikte start berdik. Bul Evropanıń kino sanaatı menen aramızdaǵı nátiyjeli hám uzaq múddetli birge islesiwden dárek beredi. Kinonıń universal tili pútkil dúnyada túsiniledi. Hár bir tamashagóy onnan turmıs ushın áhmiyetli sabaqlar alıwı múmkin. Mádeniy almasıwlar hám filmlerdiń kórsetiliwi xalıqlarımızdıń bir-birin jaqsıraq túsiniwin támiyinleydi, – dedi Shuhrat Rizaev.
Elshi Toyvo Klaar bul kinofestivalda Evropa filmleri ózbek tamashagóylerine usınılıp atırǵanınan quwanıshlı ekenin bildirdi.
– Bul festival 12 Evropa mámleketinde jaratılǵan filmlerdi óz ishine alǵan bolıp, olar tamashagóyler qálbin tereń tolqınlandıratuǵınına isenemen. Ótken on jıl dawamında festival mámleketimizdegi eń abıraylı mádeniy ilajlardan birine aylandı hám Evropa hám Ózbekstan xalıqları arasında doslıq hám mádeniy qarım-qatnas kópiri wazıypasın atqarıp kelmekte, – dedi elshi.
Baspasóz ánjumanı juwmaǵında juwapkerler jurnalistlerdiń sorawlarına juwap berdi.

Nasiba Ziyodullaeva, ÓzA