AQSh Kongressi Wákiller palatasınıń aǵzası Kerol Miller házirgi waqıtta Vashingtonda bolıp turǵan mámleketimizdiń jetekshi ǵalaba xabar quralları wákilleriniń sorawlarına juwap berdi:

– Ózbekstannan kelgen sheriklerimiz benen ulıwmalıq tárepler, sonday-aq, mámleketińizde júz berip atırǵan ájayıp ózgerisler, máselen, balalar qanday bilim alıp atırǵanı, hayal-qızlarǵa sheksiz húrmet kórsetilip atırǵanı haqqında sóylestik. Qalaberdi, tastıyıqlanıwı kútilip atırǵan Jekson-Venik dúzetiwiniń biykar etiliwi qanshelli áhmiyetli ekenligine toqtap óttik. Ulıwma, júdá jaqsı, unamlı dodalaw boldı.
Ózbekstan aymaqları hám shtatlarımız arasında regionallıq baylanıslardıń ornatılıwı ápiwayı adamlar ushın júdá áhmiyetli hám perspektivalı, dep oylayman. Men tawlı aymaqta, kómir hám tábiyǵıy gazge bay shtatta jasayman. Siziń elińizde de kóplegen ájayıp, áhmiyetli minerallar, energiya derekleri bar, bizlerde oǵada kóp uqsaslıq, bir-birimiz benen bólise alatuǵın nárseler kóp.
Mámleketlerimiz arasında sawdanı rawajlandırıw oǵada áhmiyetli ekenligi haqqında da sóz boldı. Ullı Jipek jolı, atap aytqanda, neshe mıń jıllar dawamında mámleketińiz sawda jolında qanshelli áhmiyetli mánzil bolǵanı dıqqat orayına shıqtı. Áhmiyetlisi, endi gózlengen mánzillerimizdi birlestiriw.
Bes ay aldın Ózbekstanda bolǵan edim. Kóshedegi ashıq kewilli adamlar, ápiwayı shańaraqlar hám balalar mende júdá jıllı tásir qaldırdı, ózimdi úyimdegidey sezdim. Xalqıńız júdá miymandos, awqatlar da ájayıp. Jáne barıwdı intizarlıq penen kútip atırman.
Házir Ózbekstan hám AQSh qatnasıqları turaqlı, keleshegi úmitli basqıshqa shıqtı. Qońsı mámleketler menen bolsa mámleketińiz óz-ara teńlik principine tiykarlanǵan doslıq qatnasıq ornatıp, Oraylıq Aziya regionında qáwipsizlikti támiyinlew jolında úlken jumıslardı ámelge asırdı.

Muharrama Pirmatova,ÓzA