Mámleketimizde shólkemlestirilgen Belarus mádeniyatı kúnleri sheńberinde Belarus Respublikası Mádeniyat ministri Ruslan CHerneckiy basshılıǵındaǵı delegaciya Tashkent qalasında mámleketimiz basshısınıń baslaması tiykarında qurılǵan Milliy mádeniy oraylar pavilonında boldı. Soń miymanlar jazıwshı Yakub Kolas byustine gúl qoyıw máresiminde qatnastı.

Pavilonda tuwısqan eldiń mádeniyat ministrin Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komitetiniń baslıǵı Qahramon Sariev basqarıp bardı.
Ruslan CHerneckiy bul pavilonda shólkemlestirilgen belarus, ukrain, rus, qazaq, qırǵız, túrkmen, dungan, túrk milliy mádeniy oraylarınıń ekspoziciyaları menen tanıstı.
Ózbekstanda jasap atırǵan 130 dan aslam millet wákilleri sıyaqlı belarus milletine tiyisli xalıq wákillerine jaratılıp atırǵan sharayattı joqarı bahalap, Húkimetimizge minnetdarshılıǵın bildirdi.
Sonday-aq, delegaciya Tashkent qalasında jaylasqan belarus ádebiyatınıń ullı wákili Yakub Kolas byustine gúl qoyıw máresiminde qatnastı.
Máresimde Ózbekstanda jumıs alıp barıp atırǵan “Kupalinka” Belarus folklor jámáátiniń wákilleri Yakub Kolas qálemine tiyisli shıǵarmalardı oqıp esittirdi.
Ruslan CHerneckiy belarus xalqınıń súyikli perzenti Yakub Kolas esteligine húrmet hám itibar ushın mámleketimiz basshısına óziniń minnetdarshılıǵın bildirdi hám bunday ibratlı isler eki xalıq arasındaǵı baylanıslardı bunnan bılay da rawajlandıratuǵının atap ótti.
Aytıp ótiw kerek, Yakub Kolas (1882-1956) belarus ádebiyatınıń iri wákillerinen biri. Dóretiwshi shayır, jazıwshı, dramaturg, awdarmashı sıpatında belarus ádebiyatınıń rawajlanıwına múnásip úles qosqan. Ekinshi jer júzilik urıs dáwirinde 1941-1943-jılları Tashkent qalasında jasaǵan. Urıs jılları Hamid Alimjan, Zulfiya, Ǵafur Ǵulam sıyaqlı ózbek ádebiyatınıń darǵaları menen tıǵız birge islesken. Onıń esteligin máńgilestiriw maqsetinde 2018-jılı Tashkent qalasınıń orayında byust ornatılǵan.

N.Usmonova, ÓzA