Ózbekstannıń Angliyadaǵı elshixanasında elshi Ravshan Usmonov dúnyanıń eń iri bilimlendiriw mákemelerinen biri esaplanǵan «Pearson» kompaniyasınıń biznesti rawajlandırıw boyınsha vice-prezidenti Jeyn Beyker menen ushırastı.
Sóylesiw dawamında bilimlendiriw tarawındaǵı birge islesiw perspektivası, sonıń ishinde, zamanagóy baǵdarlamalar hám texnologiyalardı respublikamızdaǵı oqıw procesine engiziw máselesi dodalandı.

Bas rezidenciyası Londonda jaylasqan, bilimlendiriw xızmeti tarawında globallıq jetekshi statusqa iye «Pearson» kompaniyası sabaqlıqlar basıp shıǵarıw, onlayn kurslar shólkemlestiriw, oqıtıwshılardıń bilimin bahalaw sisteması hám qánigeligin arttırıw baǵdarlamaların islep shıǵıwǵa qánigelesken. Jámáát strukturasında dúnya boylap 70 regionallıq oray jumıs alıp baradı. Bul bólimlerde 20 000 nan aslam qánige isleydi.
Ushırasıwda Britaniya tárepiniń wákilleri kompaniyanıń jumısı, bilimlendiriw ónimleri hám kásiplik tájiriybe hám kónlikpeni rawajlandırıwǵa qaratılǵan baslamaları haqqında maǵlıwmat berdi.
Jeyn Beyker elimizde ámelge asırılıp atırǵan, jaslardıń sapalı bilim alıwına qaratılǵan keń kólemli reformalar procesin tán aldı hám ózbekstanlı sherikler menen belsene birge islesiwge tayar ekenin bildirdi.
Juwmaǵında bilimlendiriw sistemasına xalıqaralıq standart hám innovaciyanı engiziwge járdemlesetuǵın uzaq múddetli birge islesiwdi rawajlandırıwdan ulıwmalıq mápdarlıq tastıyıqlandı.

A.Alimova, ÓzA