Qatar mámleketinde baslanǵan futbol boyınsha jas óspirimler arasındaǵı jáhán chempionatınıń «J» toparında da dáslepki tur oyınları ótkerildi.

Onda Islam Ismailov basshılıǵındaǵı Ózbekstan saylandı komandası 1-turda paragvaylı futbolshılarǵa qarsı oynadı. Ushırasıwdıń dáslepki taymı mámleketimiz futbolshılarınıń tolıq ústinliginde ótti hám oyınnıń 25-minutında Azizbek Abdumwminov Abubakir Shukurullaev tárepinen jetkerip berilgen toptı Paragvay dárwazasına anıq jollap esaptı ashıwǵa miyasar boldı.
Bul goldan ruwxlanǵan komandamız aǵzaları oyında bunnan keyin de hújimler shólkemlestirip, usınday qáwipli hújimlerdiń birin hújimshimiz Azizbek Abdumwminov tabıslı juwmaqlawǵa eristi hám ushırasıwdıń 1-taymı usı esapta juwmaqlandı.
Oyınnıń ekinshi bóliminde Paragvay saylandı komandası quramına jańa kúshler kirgizilip, olar tárepinen jiyi-jiyi qáwipli hújimler shólkemlestirildi.
Usınday hújimlerdiń birinde qorǵawshımız paragvaylı futbolshını qolı menen irkip qaldı hám oyın tóreshisi VAR dı qayta kórip shıǵıwı nátiyjesinde, dárwazamızǵa penalti belgiledi. Bul belgilengen penaltidi bolsa, Alan Ledesma 89-minutta anıq ámelge asırıp, aradaǵı esaptı qısqartıwǵa eristi.
Bunnan keyin de oyın oǵada qızıqlı dawam etti. Biraq, dárwazalarǵa bunnan basqa gol urılmadı hám Ózbekstan saylandı komandası óziniń dáslepki 3 upayın qolǵa kirgizdi.
Áhmiyetli tárepi sonda, bul jáhán chempionatında Ózbekstan saylandı komandası quramında qaraqalpaqstanlı Aziz Erimbetov, Nurbek Sársenbaev hám Bahadır Izbasqanovlar bar hám keshegi oyında Aziz Erimbetov tiykarǵı quramda oyınǵa túsip komandamızdıń jeńisine óziniń salmaqlı úlesin qostı.
Endi komandamız futbolshıları 2-turdı 8-noyabr kúni topar jetekshisi Irlandiya saylandı komandasına qarsı ótkeredi.
Maǵlıwmat ushın aytatuǵın bolsaq, birinshi turda Irlandiya Panamanı 4:1 esabında jeńip shıǵıwǵa miyasar boldı.

Adilbay Orazov,
Qaraqalpaqstan xabar agentligi sholıwshısı.