Ózbekstan Respublikası Prezidenti Shavkat Mirziyoev Amerika Qurama Shtatları Prezidenti Donald Tramptıń mirát etiwine bola ámeliy sapar menen Vashington qalasında bolıp tur.

Mámleketimiz basshısı Vashington qalasına saparı sheńberinde 5-noyabr kúni ózine ajıratılǵan rezidenciyada AQSh Kongresi Wákiller palatasınıń aǵzaları Bill Xayzenga, Kerol Miller hám Sidni Kamlager-Davtı qabılladı.
Ózbekstan menen AQSh arasındaǵı strategiyalıq sheriklik qatnasıqların bunnan bılay da bekkemlew, eki mámleket parlamentleriniń ámeliy birge islesiwin keńeytiw máseleleri kórip shıǵıldı.
Nızam shıǵarıwshı uyımlar arasındaǵı baylanıslar jedel rawajlanıp atırǵanı, AQSh Kongresinde Ózbekstan menen birge islesiw boyınsha Kokus nátiyjeli jumıs alıp barıp atırǵanı qanaatlanıwshılıq penen atap ótildi. Hár jılı Wákiller palatasında Kokus járdeminde eki tárepleme qatnasıqlardı bekkemlewge xızmet etip atırǵan Ózbekstan kúnleri ótkerilip kelinbekte.
Kongress joqarı dárejede erisilgen, bárinen burın, sawda-ekonomikalıq, investiciyalıq hám mádeniy-gumanitarlıq baylanıslardı keńeytiwge baylanıslı kelisimlerdi ámelge asırıwǵa hár tárepleme járdemlesiwi áhmiyetli ekeni atap ótildi.
Aymaqlararalıq baylanıslardı keńeytiw, kongressmenler wákillik etip atırǵan Batıs Virjiniya, Michigan hám Kaliforniya shtatları menen ámeliy birge islesiwdi jolǵa qoyıwǵa ayrıqsha itibar qaratıldı.
Ushırasıw juwmaǵında AQSh Kongresi wákilleriniń Ózbekstanǵa saparın shólkemlestiriw, sonday-aq, eki mámleket aymaqlarınıń basshıları basshılıǵındaǵı isbilermen toparlar delegaciyalarınıń óz-ara saparların shólkemlestiriwge kelisip alındı.
Bunnan soń Ózbekstan Respublikası Prezidenti Shavkat Mirziyoev Vashington qalasına ámeliy saparı sheńberinde ózine ajıratılǵan rezidenciyada AQSh Senatındaǵı Oraylıq Aziya boyınsha Kokusınıń járdemshi baslıǵı, senator Stiv Deynsti qabılladı.
Ózbekstan menen AQSh arasındaǵı strategiyalıq sheriklik qatnasıqların bunnan bılay da bekkemlew hám kóp tárepleme birge islesiwdi keńeytiw máseleleri kórip shıǵıldı.
Mámleketimiz basshısı parlamentleraralıq baylanıslarǵa, atap aytqanda, Senattaǵı Oraylıq Aziya boyınsha Kokus jumısına joqarı baha berdi.
Eki tárepleme birge islesiwde misli kórilmegen joqarı dárejege erisilgeni qanaatlanıwshılıq penen atap ótildi. Óz-ara sawda kórsetkishleri óspekte, AQShtıń jetekshi kompaniyaları menen tabıslı kooperaciya joybarlarınıń sanı kóbeymekte.
Keyingi aylarda rekord bahadaǵı kelisim hám shártnamalarǵa qol qoyıldı. Bul retki sapar etiw dawamında jańa ekonomikalıq hújjetlerge qol qoyılıwı rejelestirilgen. AQSh Kongresi bul kelisimlerdiń ámelge asırılıwın qollap-quwatlawı áhmiyetli ekeni atap ótildi.
Senator Stiv Deyns wákillik etip atırǵan Montana shtatı menen jedel birge islesiwdi dawam ettiriwge ayrıqsha itibar qaratıldı. Mámleket isbilermenleri delegaciyasınıń Ózbekstanǵa saparın shólkemlestiriw boyınsha kelisimge erisildi.
Sonday-aq, táreplerdi qızıqtırǵan áhmiyetli xalıqaralıq hám regionallıq máseleler boyınsha pikir alısıldı.
Ózbekstan Respublikası Prezidenti Shavkat Mirziyoevtiń Amerika Qurama Shtatlarına ámeliy saparı dawam etpekte.

ÓzA