Ózbekstan Turizm komitetiniń xabar beriwinshe, Tashkent “Condé Nast Traveler” xalıqaralıq turistlik jurnalı tárepinen “2026-jılı Aziyada sayaxat etiw ushın eń jaqsı orınlar” diziminen orın aldı.

Jurnal tárepinen járiyalanǵan reytingte atap ótiliwinshe, qala óziniń tariyxı hám zamanagóyliginiń siyrek ushırasatuǵın úylesimi menen turistlerdi ózine tartadı. Bul jerde áyyemgi medreseler hám bazarlar jańa mádeniy maydanlar menen birge jaylasqan hám sayaxatshılar ushın ózine tán ortalıq jaratadı.
Basılımda Tashkent Oraylıq Aziyanıń mádeniy turizm orayına aylanıp atırǵanı da atap ótilgen. Jańa “Islam civilizaciyası orayı” kompleksi hám “Zamanagóy kórkem óner orayı” galereyasınıń ashılıwı qalanı hám áyyemgi dástúrler, hám zamanagóy kórkem turmıs penen tanısıw imkaniyatın jaratatuǵın orınǵa aylandıradı.
Búgingi kúnde Tashkent turistlerdi Ózbekstannıń gózzal orınlarına baǵdarlaytuǵın baslanǵısh noqat sıpatında ǵana emes, al óz aldına turistlik baǵdar sıpatında da tartpaqta.
Qala bay mádeniy baǵdarlama hám Oraylıq Aziya paytaxtınıń ózine tán ortalıǵın usınıp, jańa tásirler hám ádettegidey emes sayaxatlardı izleytuǵınlar ushın álbette barıp kóriw kerek bolǵan mánzilge aylanadı, delinedi xabarda.

ÓzA