Samarqandta dawam etip atırǵan YuNESKO Bas konferenciyası 43-sessiyasınıń búgin ótkerilgen onınshı májilisinde wákilligi juwmaqlanıp atırǵan shólkemniń Bas direktorı Odri Azule xanım óziniń xoshlasıw sózin shıǵıp sóyledi.

2017-jıldan berli YuNESKO Bas direktorı sıpatında jumıs alıp barǵan Odri Azule xanım ótken segiz jıl dawamında shólkem maqsetlerinen kelip shıǵıp, dúnyada bilimlendiriw, ilim hám mádeniyattı rawajlandırıw, dúnya xalıqlarınıń tariyxı, mádeniyatı, dástúrleri menen qádiriyatların qásterlep saqlaw baǵdarında keń kólemli jumıslar ámelge asırılǵanı hám bunıń ushın YuNESKO shtab-kvartirası hám shólkemge aǵza mámleketlerdiń wákillerine minnetdarshılıq bildirdi.
– Biz dúnyadaǵı búgingi qıyın sharayatta YuNESKOnıń tiykarǵı maqset hám qádiriyatlarına sadıqlıq penen planetamızdıń barlıq kontinentlerindegi xalıqlardıń turmısın jáne de jaqsılaw, olardıń múnásip sharayatta bilim alıwı, gender teńlikti támiyinlew, jasalma intellektten paydalanıw, mádeniyat hám kórkem ónerden zawıqlanıwı ushın ayanbay miynet ettik, jańa joybarlar, baǵdarlamalardı ámelge asırdıq, – dedi YuNESKOnıń Bas direktorı Odri Azule xanım. – Sonıń ishinde, 89 mámleketke hayal-qızlardıń bilimlendiriwdegi qatnasıwın qollap-quwatlawǵa járdemlestik, 44 mámlekette gender máselesin qamtıp alǵan bilimlendiriw baǵdarlamaları turmısqa engizildi, jınısıy teńlikke erisildi. Joqarı bilimlendiriwde hayal-qızlardıń qamtıp alınıwı keyingi 30 jılda úsh esege kóbeydi. Eń áhmiyetlisi, búgin dúnyanıń kópshilik rawajlanǵan mámleketleri bilimlendiriw, mádeniyat hám mádeniy industriya ekonomikalıq rawajlanıwdıń tiykarı ekenin tán aldı hám soǵan sáykes túrde siyasat alıp barmaqta. YuNESKO bárqulla kúshli, óz poziciyasına iye bolǵan hám bunnan keyin de sonday abıraylı xalıqaralıq shólkem bolıp qalatuǵınına isenemen.
Odri Azule xanım óziniń shıǵıp sóylegen sózinde YuNESKO Bas konferenciyasınıń 43-sessiyasın Ózbekstanda ótkeriw baslamasın bildirgeni hám bul ilajdı joqarı dárejede shólkemlestirgeni ushın Prezident Shavkat Mirziyoevqa minnetdarshılıq bildirdi. Derlik bir hápteden berli áyyemgi Samarqandta Bas konferenciya sessiyası sheńberinde ótkerilip atırǵan mádeniy ilajlar, kórgizbe hám koncert baǵdarlamaları dúnyanıń 5 kontinentindegi 180 nen aslam mámleketten kelgen wákiller, abıraylı miymanlar ushın umıtılmas tásirler qaldırıp atırǵanın ayrıqsha atap ótti.
Májiliste YuNESKOǵa aǵza mámleketlerdiń wákilleri Odri Azuleniń eki múddet shólkemge basshılıq etip, dúnya xalıqlarınıń mápleri jolında ámelge asırǵan háreketleri, qızǵın jumısın atap ótip, oǵan minnetdarshılıq bildirdi. Sonday-aq, Franciya Prezidenti Emmanuel Makron YuNESKO Bas direktorına videomúrájat jollap, onıń nátiyjeli jumısın ayrıqsha atap ótti hám Franciya xalqı atınan minnetdarshılıq bildirdi.

ÓzA