Aldın xabar bergenimizdey, Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti tárepinen Qaraqalpaqstan Respublikasında sırt el investiciyaları hám grantların tartıw, eksport kólemin arttırıw, turizm potencialın rawajlandırıw hám jańa jumıs orınların jaratıw arqalı xalıqtıń abadanlıǵın arttırıwǵa qaratılǵan jumıslar úyrenildi.

Usı jıldıń 4-noyabr kúni Senat komitetiniń baslıǵı A.Azamxwjaev tárepinen Qaraqalpaqstan Investiciyalar, sawda hám sanaat ministri V.Jollıbekov, Shımbay rayonı hákimi A.Tajetdinov, Qońırat rayonı hákiminiń orınbasarı F.Abdumajidovtıń qatnasıwında aymaqqa sırt el investiciyaların hám turistlerdi tartıw, eksport geografiyasın diversifikaciyalaw, sırtqı ekonomikalıq baylanıslardı keńeytiw máseleleri dodalandı.
Sonday-aq, xalıq deputatları jergilikli Keńesleriniń deputatları hám isbilermenler tárepinen bul baǵdarda ámelge asırılıwı kerek bolǵan wazıypalar hám baslamalar haqqında pikir júrgizildi.
Sonıń ishinde, xalıq hám isbilermenlerdi táshwishke salıp atırǵan infrastruktura, energetika, suw támiynatı, licenziyalaw boyınsha mashqalalardı unamlı sheshiw jáne usı aymaqtı sociallıq-ekonomikalıq rawajlandırıw strategiyasın islep shıǵıw, jańa jumıs orınların jaratıw, sanaat, málimleme texnologiyaları, óndiris tarawlarınıń perspektivaları boyınsha ámeliy usınıslar islep shıǵıldı, – dep málimleme beredi senat.uz saytı.

Qaraqalpaqstan xabar agentligi