Mámleketimizde milliy armiyamızdı jańa basqıshqa alıp shıǵıw baǵdarında ámelge asırılıp atırǵan keń kólemli reformalar nátiyjesinde keyingi jıllarda sistemada jumıs alıp barıp atırǵan xızmetkerler ushın zárúr sharayatlar jaratılmaqta.

Bizge belgili, Ózbekstan Respublikası Qurallı Kúshleri akademiyası negizinde Áskeriy qáwipsizlik hám qorǵanıw universiteti shólkemlestirildi. Qurǵaqlıqtaǵı áskerler, Áskeriy aviaciya, Áskeriy medicina jáne Málimleme-kommunikaciya texnologiyaları hám baylanıs áskeriy institutları universitet qaramaǵındaǵı joqarı áskeriy bilimlendiriw mákemeleri sıpatında óz jumısın jańadan baslawı milliy armiyamızda ámelge asırılǵan eń áhmiyetli reformalardan biri boldı.
Bul joqarı áskeriy bilimlendiriw mákemeleriniń pitkeriwshileri endi eki sistemada – áskeriy hám puqaralıq baǵdarı diplomlarına iye boladı. Bul menen Watan qorǵawshılarınıń pensiyaǵa shıqqanınan keyin jámiyetimizdiń basqa tarawlarında nátiyjeli jumıs alıp barıwı, mámleketimizdiń sociallıq-ekonomikalıq rawajlanıwına úles qosıw imkaniyatı kepillenedi.
Jáne bir itibarlı tárepi, Qorǵanıw ministrligi hám bir qatar jeke gúres sport túrleri federaciyaları arasında birge islesiw memorandumlarına qol qoyılıp, bul hújjetke bola, bolajaq oficerler hám joqarı áskeriy bilimlendiriw mákemelerinde xızmet wazıypasın ótep atırǵan serjantlar ushın sport sheberligine talaban yamasa sport sheberi dárejesin alıw ushın zárúr sharayatlar jaratıladı. Ámelge asırılǵan bul háreket sebepli boks, ózbek jawıngerlik óneri, taekvonda, qılıshlasıw, qol urısı, karate federaciyalarınıń tájiriybeli trenerleri Ózbekstan Respublikası Áskeriy qáwipsizlik hám qorǵanıw universitetinde óz jumısın baslap jiberdi.
Taraw qánigesi podpolkovnik Davlat Vahobovtıń atap ótiwinshe, serjant yamasa bolajaq oficerdiń sport dárejesin alıwı áskerlerde jawıngerlik tayarlıqtı jáne de arttırıwdıń áhmiyetli faktorı bolıp xızmet etedi.
Sonday-aq, Áskeriy qáwipsizlik hám qorǵanıw universiteti sport kafedrasında Ózbekstanda xızmet kórsetken sport sheberi, ózbek jawıngerlik óneri sport nızam-qaǵıydalarınıń avtorı Pwlat Usmonov, sport sheberleri Alisher Sodiqov, Sherpolat Usmonov, Gulnora Bekmuradova sıyaqlı óz kásibiniń sheberleri úzliksiz shınıǵıwlar alıp barmaqta.
Kursantlar hám serjantlardıń eki ay dawamında tájiriybeli trenerlerden alǵan kónlikpeleriniń kórgizbesi ótkerildi. Kórgizbeli shınıǵıwlar procesinde Qorǵanıw ministrliginiń juwapker oficerleri, taraw qánigeleri eki ay dawamında ámelge asırılǵan jumıslardıń juwmaǵın talladı. Sport trenerleri hám qánigeler arasında ámeliy hám teoriyalıq shınıǵıwlardıń mazmunın jáne de bayıtıw principleri boyınsha pikir-usınıslar alǵa qoyıldı.

T.Rwziev, ÓzA