Berdaq atındaǵı Qaraqalpaq mámleketlik universitetinde studentlerdiń qáwipsizlik mádeniyatın arttırıw, ayrıqsha jaǵdaylarda durıs háreket etiw kónlikpelerin qáliplestiriw maqsetinde universitet basshıları hám Qaraqalpaqstan Respublikası Ayrıqsha jaǵdaylar basqarması menen birgelikte “Aǵartıwshılıq sabaǵı” ótkerildi.

Ilajda shıǵıp sóylegenler oqıw orınlarında turaqlı túrde usınday oqıw shınıǵıwların shólkemlestiriw zárúrligi atap ótildi. Sebebi, ayrıqsha jaǵdaylar tábiyǵıy, texnogen yamasa insan tásiri sebepli júzege keletuǵın jaǵday bolıp, adamlar turmısı hám densawlıǵına, qorshaǵan ortalıqqa, ekonomikaǵa úlken qáwip tuwdıradı. Bunday jaǵdaylarda durıs háreket etiw, birinshi járdem kórsetiw hám qáwipsizlik ilajlarına ámel etiw insan ómirin saqlap qalıwda úlken áhmiyetke iye. Sol sebepli ayrıqsha jaǵdaylarǵa tayarlıq kóriw, zárúrli bilim hám kónlikpelerge iye bolıw hár bir puqaranıń wazıypası.
– Jaslar arasında ruwxıy-aǵartıwshılıq jumıslar menen bir qatarda, olardıń ómir qáwipsizligin támiyinlew, sergeklik hám qıraǵılıq ruwxında tárbiyalaw áhmiyetli, – deydi universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov. – Sonday-aq, bunday sabaqlar tek ǵana teoriyalıq bilim beriw emes, al ámeliy tayarlıqtı bekkemlewge xızmet etedi.
Ilaj dawamında Qaraqalpaqstan Respublikası Ayrıqsha jaǵdaylar basqarmasınıń tájiriybeli xızmetkerleri ayrıqsha jaǵdaylardıń aldın alıw boyınsha profilaktikalıq bayanatlar oqıdı. Qánigeler turmısta ushırasıwı múmkin bolǵan qáwipli jaǵdaylar haqqında tolıq túsinik berip, olardıń aqıbetlerin azaytıw hám durıs háreket etiw usılların kórsetip ótti.
Sonday-aq, ilaj sheńberinde keń kólemli arnawlı taktikalıq oqıw shınıǵıwı ótkerildi. Onda studentlerge órt júz bergende imarattan evakuaciyalaw, jábirlengenlerge birinshi medicinalıq járdem kórsetiw, qáwipsiz orınǵa shıǵıw tártipleri ámeliy tárizde kórsetildi. Oqıw shınıǵıwında qatnasqan studentler ózleriniń bilim hám kónlikpelerin sınaqtan ótkeriw imkaniyatına iye boldı.
– Búgingi ilajda birinshi medicinalıq járdem kórsetiw boyınsha ámeliy kónlikpege iye boldım, – deydi student Z.Nurjanov. – Jaraqat alǵanlarǵa tez járdem beriw, júrek uslaǵanda hám dem alıw toqtaǵanda qanday háreket etiw kerekligi boyınsha túsinikler berildi.
Ilaj sońında Ayrıqsha jaǵdaylar basqarması xızmetkerleri studentlerdiń sorawlarına juwap berip, qáwipsizlik qaǵıydalarına baylanıslı bukletler hám esletpeler tarqatıldı.

Qaraqalpaqstan xabar agentligi.