Aldın xabar bergenimizdey, házirgi kúnleri Nókis qalasında tariyxta tuńǵısh márte Franciya mádeniyatı aylıǵı ótkerilmekte.

27-oktyabr sánesinen baslanǵan bul aylıq sheńberinde Franciya, Ózbekstan hám Qaraqalpaqstan Respublikası arasındaǵı kóp qırlı birge islesiwdi sáwlelendiretuǵın kóplegen mádeniy ilajlar ótkerimekte.
Usınday mádeniy ilajlardıń biri Jollıbay Izentaev atındaǵı Qaraqalpaqstan Respublikası qánigelestirilgen kórkem óner mektep-internatında ótkerildi. Franciyanıń elimizdegi elshixanası tárepinen shólkemlestirilgen bul kórgizbe «Franciya ózbek fotosúwretshisi názerinde» dep atalıp, onda tashkentli jas fotograf Babur Alimxodjaevtıń Franciyaǵa bolǵan saparı dawamında túsirgen fotosúwretleri kórgizbege qoyıldı.
Kórgizbeniń ashılıw máresiminde Qaraqalpaqstan Respublikası Ministrler Keńesiniń orınbasarı Rasul Zarikeev, Franciyanıń Ózbekstandaǵı elshisi Ualid Fuk sońǵı jılları elimizde Franciya hám Ózbekstan arasında hár tárepleme birge islesiw rawajlanıp atırǵanın, sonıń ishinde, bunday sherikshilik mádeniyat, turizm hám kórkem óner tarawlarında da tabıslı dawam etip atırǵanın aytıp ótip, mádeniy ilajlardı kóterińki ruwxta ótkeriwge járdem bergen barlıq shólkemler hám belsendi azamatlarǵa ózleriniń minnetdarshılıǵın bildirdi.
– Ózbekstan sonıń ishinde, Qaraqalpaqstan menen birge islesiw rawajlanıp atır, – dedi Franciya elshisi Ualid Fuk. – Bizler Qaraqalpaqstanda da francuz tilin oqıtıw boyınsha sóylesiwler alıp barıp atırmız. Sebebi, francuz tili tek Franciyaǵa ǵana jol ashıp qoymastan, al, pútkil dúnyaǵa keń jol ashadı. Búgin jer júziniń kóplegen ellerindegi xalıqlar francuz tilinde sóylep, óz-ara qarım-qatnas jasaydı. Búgingi fotokórgizbede sizler Franciyanıń oǵada bay tábiyatı, tariyxı, mádeniy orınları hám adamlarınıń ájayıp turmısı menen jaqınnan tanısıp, biziń elimiz boyınsha keń túsiniklerge iye bolasız dep oylayman. Bul kórgizbeni shólkemlestiriwge járdem bergen Qaraqalpaqstan Respublikası húkimeti basshılarına, ózbekstanlı fotograf Babur Alimxodjaevqa úlken raxmet aytaman.
Ilajda tashkentli jas fotograf Babur Alimxodjaev shıǵıp sóylep, Franciya boyınsha túsirilgen fotosúwretlerdiń tariyxı hám olardı túsiriw processleri haqqında kórgizbe qatnasıwshılarına aytıp berdi.
Bunnan soń fotokórgizbe ashılıp, onda kórkem óner sheberleri, jas fotograf hám xudojnikler Babur Alimxodjaev islegen dóretiwshilik miynetleri menen jaqınnan tanısıp, olardıń jaratılıw tariyxı boyınsha ózleriniń qızıqtırǵan sorawlarına tiyisli juwaplar aldı.
Ótkerilgen ilaj dawamında Babur Alimxodjaev qaraqalpaqstanlı jas fotograflar hám J. Izentaev atındaǵı Qaraqalpaqstan Respublikası qánigelestirilgen kórkem óner mektep-internatı oqıwshıları ushın master-klass ótkerip, olar menen óziniń jumıs tájiriybesi menen bólisti.
Franciya mádeniyatı aylıǵı kúnleri I. Savickiy atındaǵı Qaraqalpaqstan mámleketlik kórkem óner muzeyinde immersiv kórkem óner festivalı menen dawam etpekte.

Adilbay Orazov,
Qaraqalpaqstan xabar agentligi sholıwshısı.
M. Xabibullaevtıń túsirgen súwretleri.