Pekin qalasında bolıp ótken “Xalıqaralıq ilimiy shólkemler alyansı” (ANSO) nıń IV Bas assambleyasında Ózbekstan Respublikası Ilimler akademiyası usı shólkemniń joqarı basqarıw uyımı – Basqarıw keńesi quramına saylandı.

Bul qarar Ózbekstan iliminiń xalıqaralıq kólemdegi abırayı hám ilimiy birge islesiwdegi belsene qatnasına berilgen joqarı tán alıw sıpatında bahalanbaqta. Bul xalıqaralıq tańlaw mámleketimizdiń turaqlı rawajlanıw, ilimiy bilim almasıw hám jas izertlewshilerdi qollap-quwatlaw baǵdarındaǵı baslamalarına bolǵan isenimdi bildiredi.
Saylaw nátiyjeleri járiyalanǵannan soń, Ózbekstan Ilimler akademiyasınıń vice-prezidenti, professor Sirojiddin Mirzaev shólkem aǵzalarına bildirgen isenimi ushın minnetdarshılıq bildirdi.
Onıń atap ótiwinshe, Ózbekstan keleshekte de Aziya hám basqa da regionlarda ilimiy birge islesiwdi bekkemlew, ilimdi rawajlandırıw hám turaqlı keleshek jolında ilimiy-texnologiyalıq birge islesiwdi tereńlestiriw jolında belsene úles qosadı.

Hamroz Bayanov,
ÓzA