Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova Samarqandta bolıp ótken “Kóp tárepleme birge islesiw arqalı gender teńligin rawajlandırıw” atamasındaǵı ilaj sheńberinde YuNESKOnıń Gender teńligi bóliminiń direktorı Begonya Lasagabaster menen ushırasıw ótkerdi.

Sóylesiw waqtında Ózbekstan hám YuNESKO arasında hayal-qızlardı qollap-quwatlaw, gender teńlikti támiyinlew hám hayal-qızlardıń sociallıq-ekonomikalıq belsendiligin arttırıw baǵdarındaǵı birge islesiwdi bunnan bılay da bekkemlew máseleleri dodalandı.
Ushırasıwdıń tiykarǵı teması Prezidentimiz Shavkat Mirziyoevtiń YuNESKO Bas konferenciyasınıń 43-sessiyasında alǵa qoyǵan áhmiyetli baslaması – Hayal-qızlar jetekshiligi boyınsha YuNESKO Akademiyasın shólkemlestiriw ideyası boldı.
Ushırasıwda usı Akademiyanı shólkemlestiriw koncepciyası, onıń xalıqaralıq platforma sıpatında jumıs alıp barıw imkaniyatları hám bul baǵdardaǵı birgeliktegi baǵdarlamalardı ámelge asırıw máseleleri hár tárepleme dodalandı.
Sonday-aq, hayal-qızlardıń bilimlendiriw, ilim, mádeniyat hám sanlı texnologiyalar tarawındaǵı qatnasın keńeytiw, olardıń jetekshilik potencialın arttırıw hám aldınǵı tájiriybelerdi engiziw boyınsha ámeliy baǵdarlar belgilep alındı.
Ushırasıw doslıq hám konstruktivlik ruwxta ótip, Ózbekstan hám YuNESKO arasındaǵı birge islesiwdi jańa basqıshqa alıp shıǵıw, sonıń ishinde, “Hayal-qızlar akademiyası” baslamasın ámelge asırıw boyınsha óz-ara kelisimlerge tiykar jarattı.

N.Usmonova,
ÓzA