Usı jıldıń 1-3-noyabr kúnleri Oliy Majlis Nızamshılıq palatasınıń Spikeri Nuriddin Ismoilov basshılıǵındaǵı delegaciya Egipet Arab Respublikasınıń Kair qalasında boldı.

Sapar sheńberinde Ózbekstan delegaciyası Ullı Egipet muzeyiniń ashılıw máresiminde qatnastı. Onda 120 ǵa shamalas mámleketlik hám xalıqaralıq shólkemlerdiń delegaciyaları qatnastı.
Máresimde qatnasıwshılar tárepinen Ullı Egipet muzeyiniń ashılıwı mámlekettiń mádeniy hám tariyxıy miyrasın saqlaw hám dúnya jámiyetshiligine usınıwda jańa basqıshtı ańlatatuǵını atap ótildi. Sonday-aq, áyyemgi Egipette civilizaciya óziniń dáslepki háriplerin jazǵanı, Ullı Egipet muzeyiniń ashılıwı xalıqlar arasındaǵı tınıshlıq, awızbirshilik hám óz-ara húrmet ideyaların bekkemlewde úlken áhmiyetke iye ekeni ayrıqsha atap ótildi.
Ilaj sheńberinde mámleketimiz delegaciyasınıń Egipet Arab Respublikası Parlamenti Wákiller palatasınıń Spikeri Xanafi Ali Al-Gabali menen ushırasıwı bolıp ótti.
Egipet Spikeri usı jıl 5-9-aprel kúnleri Tashkent qalasında bolıp ótken Parlamentleraralıq awqamnıń 150-Assambleyasında qatnasqanı hám Ózbekstan Respublikası Prezidenti tárepinen qabıl etilgenin jıllı esledi.
Hanafiy Ali Al-Gabali Ózbekstanda alıp barılıp atırǵan keń kólemli reformalardı ayrıqsha atap ótti hám olar parlamentleraralıq hám xalıqaralıq kólemdegi birge islesiw ushın qolaylı sharayatlar jaratatuǵının bildirdi.
Ushırasıw dawamında eki mámleket parlamentleri arasındaǵı birge islesiwdi bunnan bılay da rawajlandırıw, tájiriybe almasıw hám parlamentleraralıq sóylesiwdi keńeytiw perspektivaları dodalandı.

M.Komilova, ÓzA