Kegeyli rayonı Abat awıl puqaralar jıyını aymaǵındaǵı “Kegeyli Aq Altın Agro Klaster” juwapkershiligi sheklengen jámiyetiniń egislik maydanlarında awıl xojalıǵı tarawı ushın áhmiyetli bolǵan gúzgi shúdigarlaw temasına baǵıshlanǵan kórgizbeli-ámeliy seminar shólkemlestirildi.

Ilajǵa Qaraqalpaqstan Respublikası Ministrler Keńesiniń Baslıǵı F. Ermanov, Nókis, Kegeyli, Bozataw, Qaraózek hám Taxtakópir rayonlarınıń hákimleri, taraw juwapkerleri, aldıńǵı fermerler hám ǵalaba xabar qurallarınıń wákilleri qatnastı.
Seminarda Qaraqalpaqstan Respublikası Ministrler Keńesiniń Baslıǵı F. Ermanov bıyılǵı jılı paxtadan mol ónim jetistirip, belgilengen rejeni artıǵı menen orınlaǵan rayon paxtashılıq klasterleri hám fermerlerge minnetdarshılıq bildirip, jerdi óz waqtında hám sapalı shúdigarlaw, kelesi jılı mol zúráát alıwdıń tiykarı ekenligin atap ótti. Sonday-aq, ilajda Ministrler Keńesiniń Baslıǵı tárepinen gúzgi shúdigarlaw jumısların nátiyjeli shólkemlestiriw, jerlerdi báhárgi eginlerge tayarlaw, aǵın suw hám texnikalıq resurslardan aqılǵa muwapıq paydalanıw hám topıraqtıń ónimdarlıǵın arttırıw boyınsha anıq wazıypalar belgilep berildi.
Ilaj dawamında Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev hám bir qatar rayon hákimleri sóz sóylep, gúzgi shúdigarlaw jumısların belgilengen múddetlerde hám agrotexnikalıq talaplar tiykarında sapalı ámelge asırıwdıń utımlı usılları haqqında ózleriniń pikir-usınısların bildirdi.
– Ótkerilgen bul seminar tek ǵana ámeliy tájiriybe almasıw emes, al diyqan hám fermerler ushın kelesi máwsimge puqta tayarlıq kóriw, jer ónimdarlıǵın arttırıwda úlken áhmiyetke iye boldı, – deydi Shımbay rayonı hákiminiń orınbasarı Islam Qayıpnazarov.
Ótkerilgen seminarǵa Qaraqalpaqstan Respublikası Joqarǵı Keńesiniń agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A. Jumanazarov qatnastı.

Adilbay Orazov,
Qaraqalpaqstan xabar agentligi sholıwshısı.