Hár bir jas ushın ómirdegi eń úlken imkaniyat – bilim alıw imkaniyatı. Ásirese, bul bilim zamanagóy texnologiyalar menen baylanıslı bolsa, onıń bahası eki esege artıp baradı.

Ózbekstan mámleketlik jáhán tilleri universitetinde óz jumısın baslaǵan “Ózbekstan – Qıtay” Ekinshi bilimlendiriw forumı jaslarǵa aldınǵı tájiriybe hám innovaciyalıq bilim esigin ashpaqta.
Forum sheńberinde Innovaciyalardı engiziw hám texnologiyalar transferi milliy ofisi hám Qıtaydıń ArkInno Hub (Shenzhen) Industrial Operation Co. Ltd. kompaniyası arasında birge islesiw memorandumına qol qoyıldı. Bul kelisim joqarı bilimlendiriw mákemeleri, ilimiy-izertlew institutları, texnoparkler hám isbilermenlik subektleri arasında innovaciyalıq birge islesiwdi rawajlandırıwǵa qaratılǵan.
Sonday-aq, Ózbekstannıń bir qatar professional bilimlendiriw mákemeleri hám Qıtaydıń aldınǵı bilimlendiriw hám sanaat shólkemleri arasında da memorandumlarǵa qol qoyıldı. Olar sheńberinde oqıtıwshı hám studentler almasıwı, qospa oqıw joybarları, Qıtay tájiriybesine tiykarlanǵan oqıw baǵdarlamaların engiziw hám startap baslamaların qollap-quwatlaw rejelestirilgen.
Forum qatnasıwshıları ushın universitet hám texnikumlarǵa saparlar da shólkemlestirildi. Sapar dawamında miymanlar bilimlendiriw mákemeleriniń oqıw processleri, materiallıq-texnikalıq bazası hám xalıqaralıq birge islesiw baǵdarları menen jaqınnan tanıstı.
Ushırasıwlar nátiyjesinde Tashkent transport texnikumında “Qıtay-Ózbekstan telekommunikaciyalar sanaatı ustaxanası,” sonday-aq, Shayxontohur politexnikumında “Qıtay-Ózbekstan jańa energiya quralları ustaxanası” ashıldı.
Bul ustaxanalar telekommunikaciyalar, jasıl energiya texnologiyaları, elektrotexnika hám energiyanı únemleytuǵın mexanizmler baǵdarında orta buwın maman qánigelerdi tayarlawǵa xızmet etedi.

Nigora Rahmonova, ÓzA